Kalaallit Nunaanni Politiit: Ikerasaap qaqqaani annaassiniarneq
Uummannap eqqaani Ikerasammi inuit sisamat qaqqamiitsillutik ingerlariaqqissinnaajunnaarmata annaassiniartoqartariaqalersimavoq.
Qulimiguulik annaassiniarnermi atorneqartartoq aallartinneqartariaqarsimavoq, Uummannami eqqaani Ikerasammi inuit sisamat qaqqamiitsillutik ammukarnaveersimapput.
Annaassiniarneq marlunngormat ingerlanneqartoq, Kalaallit Nunaanni Politiit tusagassiutitigut nalunaaruteqarlutik ilisimatitsipput.
Angut inuusuttoq kisimiilluni qaqqamut pisuttuartilluni innakkoorsimavoq, ingerlariaqqinnerlu ajulerluni. Angut inuusuttoq pisuttuarnermini sumiissusersisinnaajunnaarsimavoq, taamaasillunilu innaannarmut pisoorsimalluni.
Inuit pingasut sumiiffimmik pisuttuartarfimmillu ilisimannilluartut, taakkununnga ilaalluni angutip inuusuttup ataataa, aalajangersimapput namminneerlutik angut inuusuttoq ammukartillugu ikiorniarlugu.
Inuit sisamat ingerlariaqqinnaveertut
Qaqqamili sivingasumiitsillutik inuit pingasut annaassiniarniaraluartut aamma ingerlariaqqissinnaajunnaarsimapput, politiillu kalerrinneqartariaqalerlutik.
- Politiit kalerrinneqarput pinasuartumillu annaassiniarnissaq (SAR – Search and Rescue) aallartinneqarluni. Annaassiniarneq Uummannap politiivinit, Nuummi politiit qitiusumik aqutsisoqarfianit suleqateqartunit, aqunneqarpoq. Uummannami qatserisartut qaqqami navialisunik ikiuussinnaanermut ilinniarnikuusut sumiiffimmut apuunneqarput, inuillu sisamat ikiorlugit ammukartinniarsimallugit. Tamannali iluatsinngimmat paasineqarpoq navialisut qulimiguulimmit taamaallaat aaneqarsinnaasut, Kalaallit Nunaanni Politiit tusagassiutinut nalunaarummi allapput.
Annaassiniarneq imaannaanngitsoq
Air Greenlandimit qulimiguulik annaassiniarnermit atorneqartartoq, Arktisk Kommando peqatigalugu pissarsiarineqarpoq. Annaassiniartussallu Ikerasammut aallartinneqarlutik.
- Annaassiniarneq ilungersunartorujussuuvoq, inuimmi sumiiffigisaat navianarluinnarami. Annaassiniartut qulimiguulimmik qaqqap sivingasup sinarpiaanut pisariaqarsimapput, qulimiguulik qaqqap saneralaannguani timmitillugu, qulimiguullip kaavittuisa innaq attunngilaartarsimallugu, allassimavoq.
Inuit sisamat annanneqartut qulimiguulimmit amuarneqarput, piaartumillu isumannaatsumukaanneqarlutik. Kalaallit Nunaanni Politiit ilisimatitsipput inuit sisamat pineqartut nunaqarfimminnut unnukkut angerlaanneqaqqereersimasut.