Kalaallit Nunaanni Politiit ilinniartitsisimasut: Kommunefogedit pikkorissartinneqarsimapput

Kommunefogedit 18-it nunamit tamarmeersut Kalaallit Nunaanni Politiinit pikkorissartinneqarsimapput. Sapaatip-akunnerani ataatsimit tamanna ingerlanneqarsimasoq naammassineqaqqammerlunilu.

Politiit suliassaat aamma kommunefogedit najukkaminni toqqissisimatitsiniarlutik suliassaat pillugit saqqummiiffigineqarsimaapput, Kalaallit Nunaanni Politiinit tusagassiorfitsigut nalunaaruteqarnermi oqaatigineqarpoq.

Pikkorissartut aamma sianissutsikkut piareersimasarnissaq pillugu saqqummiiffigineqarsimapput, ilaatigut artornarsinnaasumik pisinnaasunut, ilungersunartumik pisoqarsimatillugu ilaqutaasunut nalunaaruteqarnissamut qanoq piareersartoqarsinnaaneranik ilisimasaqarnerulersillugit, minnerunngitsumillu politiit suliassaqartinneqalissappata nunaqarfimmiluunniit ajutoortoqassangaluarpat iliuuseqarnisssamut qanoq pisussaaffeqarneq ilinniartitsissutigineqarsimalluni.

Pissarsilluarsimasut

Aqqa Thorvald Isaksen Narsarsuarmeersoq pikkorissaqataasimavoq.

Akunnittarfimmi ulluinnarni handymanditut sulisarpoq, siusinnerusukkullu qatserisartuullunilu ilisinissamik aaqqissuisartuusimalluni, taakkulu pillugit misilittakkani kommunefogeditut sulinermini atorsinnaallugit. Pikkorissartitsinermut peqataanini pissarsilluarfigisimavaa.

- Suliffigisimassanni toqusoqartarnera ajutoortoqartarneralu isummerfigikulasarsimavakka, tigusarinnittarnerunngitsorli il.il.. Kommunefogedinngorlaatut assersuutigalugu angerlarsimaffinni eqqissiviilliortoqartillugu qanoq iliuuseqarsinnaanera pissanngatigisimaqaara. Malittarisassat suut malissavakka, ikiorsiissutinik qanoq ittunik atugaqassaanga il. il.., Aqqa Thorvald Isaksen oqarpoq, nangillunilu:

- Pikkorissaqataaninni tamakku paasisaqarfigaakka. Tamatuma saniatigut ikiueqqaarnermik paasisaqartinneqarneq pitsaasimaqaaq.

- Pikkorissaqataanini nuannarilluinnaraa

Elisa Kristensenip Tiniteqilaami kommunefogedisup pikkorissarneq aamma pissarsilluarfigisimavaa, - naak marloriarluni pikkorissaqataasimagaluarluni.

- Pikkorissaqataasarnera nuannarisaqaara, ullualunnguimmi ingerlaneranni ilikkagaqarnartaqimmat. Ukioq manna atuagarsorneq sungiusarnerlu akuleriissilluarneqarsimapput, tassa tusarnaaginnartinneqarata. Ilaatigut inuunermik annaassiniarluni ikiueqqaarneq imminullu illersorsinnaaneq pillugit ilinniartinneqarpugut, Elisa oqaluttuarpoq.

Nangillunilu oqaatigaa:

- Ukioq manna pikkorissaaneq Nuummi ingerlanneqarpoq, taamaammallu nammineq isinnik vagtcentrali takusinnaasimallugu. Tiniteqilaami kisimiillunga suliassaqalissaguma qanoq ikiortissaqartinginera takullugut toqqissiallannaqaaq.

Kalaallit Nunaanni Politiinit ilisimatitsissutigineqarpoq, kommunefogedit politeeqarfinni ilinniartinneqartartut. Tamanna pisarpoq, kommunefogedinngorlaat kommunefogeditullu misilittagallit suliassaat aamma Kalaallit Nunaanni Politiit suliassaat allat pillugit ilisimalikkanik paasissutissinniarlugit.