Skip to main content

Kalaallit Nunaanni nalunaaquttap ingerlaarfia allanngortinneqartoq naak eqqasuutigineqaraluartoq

Nalunaaquttap ingerlaarfianut allannguutissatut siunnersuut Inatsisartut sisamanngornermi akuersissutigimmassuk Kalaallit Nunaata annerpaartaani nalunaaquttap ingerlaneranik aaqqiisarneq aappaagumiit allanngortinneqassaaq. Siunnersuutip oqallisigineqarnerani inuiaqatigiit peqqissusaannut kinguneqarsinnaanera ernummatigineqarpoq.

Kalaallit Nunaat 2023-p ingerlanerani nalunaaqutaqatigiissummut nutaamut UTC-2-mut nuussaaq.

Naalakkersuisut UTC-2 nunatsinni atuutilernissaanut siunnersuutaat Inatsisartut sisamanngornermi akuersissutigaat.

Nalunaaquttap aalajangersarneqarneranut allanngortitsineq isumaqarpoq, Kalaallit Nunaat akunnermik ataatsimik Europap Danmarkillu nalunaaqutaannut nikingalissasoq. Tassalu aamma akunnermik ataatsimik Nordamerikamit sivisunerusumik ungasinnerulissasoq, tassalu sumiiffinni taakkunani nikanganeq akunnernik pingasuulissallutik.

Siunnersuut Inatsisartuni oqallisigineqangaatsiareerluni, ataatsimiititaliamullu pingasoriarluni innersuussisoqareersorlu taasissutigineqarpoq.

Nunap sumiissusaanik aalajangersaariaaseq atorunnaartoq

Siunnersuutip peqqissaartumik suliarineqarneranut pissutaavoq, politikkerit allannguinissamut ernummateqarnerat. Allannguinermi inuit peqqissussaannut sunniuteqarsinnaanera ernummatigineqarmat.

UTC-2-miilerneq Kalaallit Nunaata sumiissusaa aallaavigalugu nalunaaqutaqarneq atorunnaassaaq, tassa nunap sumiinneranut allorniusat tukimukartut aallaavigalugit. Nalunaaquttap qassinngorneranut aalajangersaariuseq taanna malillugu aaqqissuussaavoq, tassalu seqerngup qullasinnerpaaffia ulloqeqqata nalaaniittarluni.

LÆS OGSÅ: Nalunaaquttap ingerlaarfianut allamut ima ikaarsaartoqarsinnaavoq

Nalunaaquttap qassinngorneranik nutaamik atuutsitsilernerup kingunerissavaa ullaakkut taarnerusalernissaa, ualikkut unnukkullu qaamanerusalissalluni. Taamaattoqalerpat arlaatigut kinguneqarnerlussanersoq Naalakkersuisut misissorsimanngilaat.

Inatsisinut ataatsimiititaliap tamanna paasiniaaffigaa ilaatigut Islandimi misilittakkat paasiniaaffigalugit.

Islandimi misilittakkat paasiniaaffigineqassasut

Island aamma nalunaaqutaq akunnermik ataatsimik nikisinneqarnikuuvoq, tassani UTC +0 atuutilernikuulluni, naak nunap inissisimavia aallaavigalugu nalunaaqutaq UTC -1 malittussaagaluaraa. Islandi aasaanerani nalunaaquttamik allanngortitsineq ajorpoq. Taamaattoqarnerani Reykjavikkimi ualikkut marlup qeqqanut seqineq qullasinnerpaaffissaminiittarpoq.

Inatsisinut ataatsimiititaliap paasiniaanermini paasivaa Islandimi inuusuttut nalunaaquttat akunnerini siniffissatut kaammattuutigineqartut naammatsiffigisanngikkaat misissuiffigineqarsimasoq. Islandimi ullup unnuallu ingerlanerani inuit qanoq ingerlariuseqarnerisa misissuiffigineqarnissaannut 112 milliuunit koruuninik aningaasaliisoqarsimasoq.

Suliap 2024-mi naammassineqarnissaa naatsorsuutigineqarpoq, ataatsimiititaliallu Naalakkersuisut Islandimi oqartussat attaveqarfigissagaat kaammattuutigaa, misissuineq sulinerminnut atorneqarniassammat.

Nalunaaquttap ingerlarnga nutaaq 2023-mi atulissasoq

Taama kaammattuineq Naalakkersuisut tusaatissatut tigugaat, Naalakkersuisut siulittaasuata pingajussaarinninneranni oqaatigaa:
- Naalakkersuisut pingaartippaat Kalaallit Nunaanni ilisimatusartut peqqinnissaqarfiullu misissukkat taakku takusaqarfiginissaat, Múte B. Egede oqarpoq.

LÆS OGSÅ: Nalunaaquttap aalajangersarneqarnera pillugu oqallinneq: Aasaanerani nalunaaquttap atorunnaarsinneqarnissaanut sooq EU utaqqissavarput?

Inatsisissatut siunnersuut maanna akuerineqartoq marsip 25-ani 2023-mi unnukkut aqqanernut atuutilissaaq. Tassani Kalaallit Nunaani aasaanerani nalunaaquttap siuartinneqarnerani UTC -2-mut pinermi.

- Illuatungaanili Kalaallit Nunaanni ukiuunerani/nalinginnaasumik nalunaaquttap ingiaqatigiiffianut oktobarimi 2023-mi arfininngornermi kinguartitsisoqassanngilaq, tassa UTC -2-miiginnartoqassalluni, Naalakkersuisut siunnersuummi allapput.

Ittoqqortoormiini, Danmarkshavnimi aamma Pituffimmi nalunaaquttap ingiaqatigiiffiini allanngortitsinissaq eqqarsaatigineqanngilaq. Naalakkersuisulli taakkununnga atatillugu suliaqarnertik ingerlateqqissavaat. Nalunaaquttap ingiaqatigiiffia allanngortinneqassappat Ittoqqortoormiini innuttaasut tusarniarfigineqaqqaassapput.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER