Kalaallit Nunaanni misissuisimaneq Amerikami atuagassiami saqqummiunneqartoq
Misissuisimanerup takutippaa, Kalaallit Nunaanni inuit timasa inuussutissanik suliarinnittarneri ajoquteqalissanngippata nerisamikkut immikkut jodimik pisariaqartitsisut.
Nunatsinni ilisimatusarnermi nassaat malillugit ilimagineqarpoq kalaallit jodimik annertunerusumik pisariaqartitsisut, qinersip torluup saaniittup nappaataat pinaveersaartinniarunikkit.
Misissuineq ilisimatusarnikkut Amerikami atuagassiat nuimanerit ilaanni 'Thyroid'-imi oktoberimi saqqummersinneqarpoq.
Paneeraq Noahsen, Karsten Rex, Inge Bülow Pedersen, Gert Mulvad, Hans Christian Florian Sørensen, Michael Lynge Pedersen aammag Stig Andersen misissuisuusimapput.
Timip inuussutissaminik suliarinnittarnera qaffasippallaartoq
Nuummi Tasiilallu pigisaanni najugallit 50-init 69-it tikillugit ukiullit peqataapput, paasissutissat inooriaatsimut, nerisanut nappaatinullu tunngasut katersorneqarlutik. Quumik katersuisoqarpoq aaviisoqarlunilu. Peqataasut takissusaat oqimaassusaallu uuttorneqarput, qinersillu torluup saaniittup allisoorsimaneranik (struma) misissuisoqarluni. Quup jodeqassusaa misissorneqarpoq, aammiillu qinersip torluup saaniittup sulinera misissorneqarluni.
- Paasivarput kalaallit Nuummi najugallit WHO-p innersuussutaata assinganik joditortut, kalaallilli Tasiilap pigisaani najugallit WHO-p innersuussutaanit annertunerulaartumik joditortut, tusagassiorfinnut nalunaarummi allassimavoq.
Ilisimatusartut tupaallaatigisimannik paasisimavaat, amerlasuut qinersip torluup saaniittup sulivallaalerneranik nappaateqartut (forhøjet stofskifte), ikinnerusullu qinersip annikillisimasumik sulineranik nappaateqartut (lavt stofskifte).
- Paasisagut tupaallaatigaagut peqqutigalugu taamatut nappaatit agguataarneqarneri inuiaqatigiinni jodimik amigaateqartuni takussaasarmata. Nunatsinnilu kalaallit jodimik naammattumik nerisaqarlutik, erseqqissaassutigalugu oqaatigineqarpoq.
Jodimik annertunerusumik pisariaqartitsisut
Misissuisimanerup aamma takutippaa, qinersip torluup saaniittup nappaataannik atugaqartututut paasineqartut 83 procentii peqqinnissaqarfimmit ilisimaneqanngitsut.
- Paasisatta isumaliortilerpaatigut kalaallit ukiorpassuarni jodeqarluartumik nerisaqarnermikkut naleqqussarsimasut. Tamanna ilumoorpat isumaqarpoq kalaallit qinersip torluup saaniittup nappaataat pinaveersaartinniarlugit jodimik pisariaqartitsinerat WHO-p innersuussutaaniit annertunerusoq. Tamaammat ilisimatusarnerput ingerlateqqissavarput, sukumiinerusumik paasisaqarumalluta, nalunaarummi allassimavoq.