isiginnaartitsisartut
Kalaallit Nunaanni isiginnaartitsisartut peqatigiiffiat nutaaq
- Isiginnaartitsinerup iluani assigiinngitsunik suliaqartut ataatsimoorfiusumik peqatigiiffeqarnissaat amigaatigisimavarput, siulittaasunngortoq oqarpoq
Sila.
Isiginnaartitsisartut peqatigiiffittaavat taama taaguuteqarpoq.
Ataatsimeersuartoqareernerata kingorna peqatigiiffik pilersinneqarpoq arfininngormat.
Siulittaasumik siulersuisunillu qinersisoqarpoq – siulittaasutut qinigaalluni Siri Paulsen siulersuisunngortullu tassaalerput AneMarie Ottosen, Naleraq Eugenius, Kristian Mølgaard kiisalu Susanne Andreasen.
- Aallartinnerput nuannaarutigaarput siulersuisunngortugullu qilanaareqaarput isiginnaartitsinermik siuarsaalluta sulinissarput taamatullu aamma Kalaallit Nunaanni suliaqartunik sullissinissarput. Amigaatigisimavarput isiginnaartitsinerup iluani assigiinngitsunik suliaqartut ataatsimoorfiusumik peqatigiiffeqarnissaat, siulittaasoq Siri Paulsen oqarpoq.