Kalaallit Nunaanni apummik inuusaliaq anginerpaaq

Sisimiuni Kulturikkut Illorsuaq Taseralik suliniummut ”Aalasa”-mut atatillugu kajumissutsimik suliaqartarnermik ataqatigiittarnermillu siuarsaaniarpoq. Taamaammat innuttaasut kaammattorneqarput, Kalaallit Nunaanni apummik inuusaliamik anginerpaamik sanaqataajartoqqullugit.

Tallimanngorpat martsip 26-ani nal. qulinut apummik inuusaliorneq aallartinneqassaaq. Apummik inuusaliorneq sapaatip akunnerata naanerani inaarsarlugu suliarineqassaaq, sapaatiuppallu martsip 28-ani apummik inuusaliaq naggataarutaasutut atisalerneqassalluni.

”Jerusalema Dance”

Sapaammi ataatsimut ammaanersiorluni oqaaseqartoqassaaq, tasermilu inuit pinnguaataannik assigiinngitsumik sammisaqartitsisoqassalluni.

Nal. pingasunut ”Jerusalema Dance” Covid-19 pissutigalugu matooraanerit nunarsuarmi tamarmi eqqaaniarneqarneranni atorneqartoq naggasiutigineqassaaq. Sisimiormiut tamarmik Kalaallit Nunaanni anginerpaamik apummik inuusaliornermut peqataanissamut tikilluaqqusaapput.

Nivaattamik apummillu sananermi atorneqarsinnaasunik allanik nassartoqarsinnaavoq, Kulturikkut Illorsuaq Taseralik tusagassiorfinnut nalunaaruteqarnermi ilisimatitsivoq.

”Jerusalema Dance” pillugu assersuut takuuk