Kalaallit Nunaanni aatsitassanik suliareqqaarineq akisuallaartoq
Aatsitassanut inatsimmik qasukkaanissaq pisariaqarpoq Kalaallit Nunaat ingerlatseqatigiiffinnit orniginartuussappat. Taama Tanbreezimi pisortaq Greg Barnes Killavaat Alannguani akuersissuteqarfigineqarnissaminik ukiuni arfineq marlunni utaqqisimasoq isumaqarpoq.
IA-miit Peter Olsenip Aatsitassanut inatsimmi qasukkaasoqarnissaa kissaatigaa, taamaalillutik ingerlatseqatigiiffiit maani nunami aatsitassanik piiarneqartunik suliareqqiisariaqaratik. Siunnersuut Aatsitassanut Naalakkersuisumit Erik Jensenimit taperserneqarpoq, Peter Olsenimut akissummini allalluni, Kalaallit Nunaanni suliareqqiinissamik piumasaqarneq aatsitassarsioqatigiiffiit aningaasartuutaannik qaffatsitsissasoq Kalaallillu Nunaanni aatsitassanik piiaarusuttunut kinguarsaataalluni.
Aviisi Sermitsiaq taama allaaserisaqarpoq.
Nunarsuup illuatungaani Perthimi seqinnarissumi ingerlatseqatigiiffiup Tanbreezip pisortaata Greg Barnesip Aatsitassanut Inatsisip ingerlatseqatigiiffinnut iluaqutaasumik allanngortinnissaa qilanaaraa.
– Qanorluunniit pisoqaraluarpat piiakkat sumi suliarineqarnissaanik aalajangiineq ingerlatseqatigiiffimmiippoq. Soorunami Kalaallit Nunaanni suliareqqiinissamik piumasaqaat siunissami aatsitassanut
inatsimmi qasukkarneqarpat tamanna uagut ingerlatseqatigiiffiillu allat iluaqutigissavarput. Tunngavilersuiuarsimavugut aningaasaqarnikkut, isumaginninnikkut avatangiisinullu tunngatillugu aatsitassanik qaqutigoortunik suliareqqiinerup Kalaallit Nunanni pinissaa isumatsialaanngitsoq. Kinami immaqalu USA-mi EU-milu aatsitassat qaqutigoortut suliareqqinneqarsimasut eqqunnerat akitsuuteqarpoq. Taamaalilluni aatsitassat qaqutigoortut Kalaallit Nunaanni suliareqqinnerat aksuneruinnaranilu attaveqarnikkut ajornakusoornerunerata saniatigut aamma akitsuummik akisunerulersitsisussamik akiliisariaqarpoq, tamannalu ilaannikkut 100 procentimik akusinerulersitsisinnaavoq. Tamanna aningaasaqarnikkut akilersinnaanngivippoq, Greg Barnes aviisimut Sermitsiamut oqarpoq.
Tapersersorneqannginneq
Taarsiullugu Kalaallit Nunaanni aatsitassat avammut nassiunnissaat aallunneqartariaqarpoq nunat allat suliareqqiitillugit.
– Nunannguatut eqqussinermi akitsuutinut unammillertariaqanngilaq. Kisianni soorunami siunissaq ungasinnerusoq eqqarsaatigalugu suliareqqiivimmik sanasoqarsinnaavoq tunisassiorneq ukiuni arlalinni ingerlareersimappat. Taamassappalli sulisut ataavartumik sungiusarneqarlutillu ilinniartinneqatariaqarput, sumiiffimmilu qitiusumillu tapsersorneqarluni, soorlu attaveqaatitigut annertusiinermi sumiiffinnilu ilinniarnissamut periarfissat qulakkeerneqarlutik.
Qitiusumik aqutsisoqarfimminngaanniit tapersersorneqannginneq Tanbreezip Killavaat Alannguani aatsitassarsiornissaanut qanoq kinguneqarnersoq, Greg Barnesip isummernera pillugu aviisimi Sermitsiami atuarnerusinnaavutit. Aviisi uani ataani pissarsiarisinnaavat: