Skip to main content

Kalaallit norskit arnartaannut akersuuttut

Kalaallit arnat ukiuni 22-ni vm-imut peqataasimanatik unammeqqaarngaarmata, Stavangerimi timersortarfissuaq isiginnaartunik ulikkaarpoq.

Kalaallit arnartaat ukiuni 22-ni vm-imi peqataanikuunatik unammeqqaavikkamik unammillerneqangaatsiarput. Norskit arnartaat nunarsuarmi pissartanngortussatut ilimagineqarluarput. Kalaallit Nunaalli unamminermi piffissaq siulleq malinnaalluarpoq, norskillu isertitsigaangata malitsigisaanik isertitsisarlutik.

Kalaallinik isiginnaariartut unammineq tamaat illersuiuarput, arnallu unammiartut tapersersortuarlugit.

Kalaallit Nunaat assammik arsarnermi pissaanilissuarnut unammigaluarlutik, taamaattoq unamminermi pissanganerminnik takutitsinngillat, nuannisarnertilli takutittarlugu.

Minutsit 15-it ingerlareersut aatsaat Norge siuariartulerpoq. Kalaallit Nunaat tatineqarneruleriartoraluartoq, illersuisut nipaginngillat. Kalaallilli norskit illersuinerat pissutigalugu isertitsineq ajulertalerput.

Isertitsinerit tamaasa nuannanneq

Kalaallit Nunaat isertitanik sisamanik kinguaqqalernerminni måliniittoq anisikkallarlugu saassussinermi titarnerniittartut marlunngortittarlugit misiliigaluarput. Norgemili unammisartuni forsvariniittut 1,80 miiterisut angitigisut akulloqqukkuminaapput. Kalaallilli isertitsineri tamarmik timersortarfimmi nuannaffiupput, illersuerpalaarlu ilisarnartoq tusarsaavoq. Unamminerup unikkallarnissaanut minutsit quliinnanngortut Kalaallit Nunaat time-outissalluni aalajangerpoq, Norge 11-6-imik siuaqqasoq.

Time-outernerugaluarli Kalaallit Nunaannut iluaqutaanngitsoorpoq, unamminerullu immikkoortua siulleq naammassimmat Norge 19-7-imik siuaqqavoq.

Tikeraarfiit sallaanngivissut

Unamminerup immikkoortuata aappaani minutsit arfineq-marluk ingerlareersullu Kalaallit Nunaat kiisami isertitsitseqqippoq, minutsilli tamapajaasa Norgep siuaqqanini annertusigaluttuinnarpaa. Unammisut ilaat minutsini marlunni anigallartinneqarnerani måliniittoq ingisikkallartarlugu kalaallit misileeqqipput, Norgelli saassussipallannerni tamanna isertitsissutigisarpaa.

Unamminerup immikkoortua aappaa Kalaallit Nunaannut ilungersunarnerusoq, Norge suli isaatitsiuarpoq. Kalaallilli unammisartui - isiginnaartullu - nikallujallanngillat, kalaallillu isertitsinerini tamani, arsaarsinerni annaassinernilu nuannattoqartarpoq.

Naak unammisat assoroornarsinnaagaluartut kalaallit unamminerup minutsiini kingullerni sukkanerusumik arsalerput, isertitseqqillutillu.

Kalaallit Nunaannit måliniittup annaassisaqattaalernerani unammineq naammassivoq, unammineq 43-11-mik inerneqartoq Norge ajugaalluni.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER