dronningen fylder 75 år
Kalaallit naatitaat salaati norskit imigassaatut tuniniarsiuk
Dronning Margrethe quiasaaraluni tuniniaanissamik periarfissamik siunnersuuteqarpoq
Dronning Margrethe aamma Prins Henrik Kalaallit Nunaat arlaleriarlugu angalaartarnerminni tikittagaat amerlaqaat, aasaq manna kunngikkormiut nunatsinni angalaarneranni nunalerinermik misileraavik Upernaviarsuk tikikkamikku tupaallatsinneqarput.
Suli taanna pinngitsoq Prins Henrik naatitsinermik soqutigisalittut aamma ilisimaneqartoq angalaarujoorpoq, misileraanermik ingerlatsiviup naasuuterpassui ineritaalu naammasarlugit attuuasarlugit ilaatigullu nutsuttarlugit.
Naatsitsiviit kiarujuttut ilaanni naatsitsinermik pisortaq Anders Iversen, salatimik tigusivoq savimminillu qupillugu salaatip pilutai dronningimut, hofdaminut kunngikkormiullu malittaannut agguaallugit.
Prins Henrik tomatinik romainesalaatillu pilutaanik oqummissillattaavoq.
- Mmm. Mamarput. Mamartorujussuupput, Prins Henrik nersualaarivoq allaanngilarlu peqataasut tamaasa ussigassanik agguaassiviginiarai.
- Tomatit salaatillu pisiniarfinni qanoq akeqarpat?, Prins Henrik alapernaalluni aperaaq.
Akineqarami tunummut uppingajappoq. Anders Iversenip aki eqqoqqissaartoq ilisimannginnerarpaa, nalunaguli 20 kr.-nit ataallugit akeqarsinnaanngitsut.
Danmarkimi akinut naleqqiullugu taama qaffasitsigisumik akeqartitsineq naatitsinermik pisortamit nassuiaaserneqarpoq, naatsitanik angallassinerup pisariunera. Salaatit niaquusai Kujataaniit Ilulissanut umiarsuarmik ulluni arfinilinni sivisussusilimmi assartorneqarsinnaalluartut, Anders Iversen nassuiaavoq.
Imaatigut assartuussineq taamaattoq tusarlugu Dronning Margrethe eqqarsariaallakkunarpoq. Taassuma Linie Aquavit eqqaavaa, norgimiut snapsiliaat aningaasanik kaaviiaartitsilluartoq, taassuma snapsip imigassanit allanit allaanerussutigaa, maqinneqalertigani qaammatit arfinillit imarsioqqaartarami.
Dronningi qungujuutigaluni oqariarpoq:
- Taavami kalaallit salaatiutaat Linie Aquavittitut tuniniarniarsiuk!
Dronningip apriilip 16-ani 75-iliineranut atatillugu aviisi AG dronning pillugu immikkut sammisaqarpoq. Aviisimi immikkut sammineqarnera apriilip 15-ani saqqummersoq, akeqanngitsumik pdf-ikkut aaneqarsinnaavoq.
Aviisi tamakkiisoq aamma uani pisiarisinnaavat: