Kalaallit meerartaannut 100.000 koruunit
Peqatigiiffik Kalaallit Meerartaannut Tele-Post 100.000 koruuninik tunniussivoq. Aningaasat frimærkinit Dronning Margrethep imilersarissanik kalaalerpaluttunik assitalinnit tapiliussaninngaanneerput.
Frimærkip tuniniakkap nalingata qaavanut tapiliussanit isertitat 100.000 koruunit TELE-POST-ip Peqatigiiffik Kalaallit Meerartaannut tunniuteqqammerpai.
- Dronningip eqqumiitsuliaminik frimærkinut tunniussinera ataqqinaataavoq immikkuullarilluinnartoq. Tamatuma iliuutsip klaallit meerartaanut iluaqutaanissaa, saniatigut nuannaarutissaalluinnarpoq, Tele-Postimi frimærkinik nioqquteqarnermut pisortaq, Allan Pertti Frandsen oqarpoq.
Dronning Margrethe Peqatigiiffik Kalaallit Meerartaannut illersuisuuvoq, nammineerlunilu tuniniaanermit tapiliussat nalingat Tele-Postip peqatigiiffimmut tunniutissagai kaammattuinikuulluni, Tele-Post tusagassiuutinut nalunaarummi allappoq.
Peqatigiiffik Kalaallit Meerartaasa tunissut qiimmatsaatigaat, aningaasallu Kalaallit Nunaanni sulinermi atorneqarnissaat ilisimatitsissutigaat.
- Frimærkip nalingisa qaavatigut akiliummit isertitat Kalaallit Nunaanni sulinitsinnut atorneqassasut aalajangertoqarmat assorujussuaq tuppalliutigaarput. Maanissaaq, Danmarkimisulli, sulivugut, toqqissisimasumik meeraanissaq pitsaasumillu siunissaqarnissaq kalaallit meerartaannut inuusuttortaasalu tamanut atuuteqqullugit, Peqatigiiffik Kalaallit Meerartaanni siulittaasoq, Kirsten Bitsch, taama oqarpoq.
Ukiut tamaasa immikkut ittumik frimærkimit tapiliussamik nalilimmik Kalaallit Nunaanni ajunngitsuliornermut imaluunniit kulturikkut siunertalimmik suliaqartoqartartoq, TELE-POST ilisimatitsivoq.