Kalaallit meeqqat inuusuttullu kunngissap nulia kulturikkut ataatsimeersuartoqarnerani naapippaat
Meeqqat nunani tamalaanit kulturikkut ataatsimeersuarnerat ”Children Need Arts – Global Summit” ataasinngormat Københavnimi Skuespilhusetimi aallartippoq. Kunngissap nulia Mary ataatsimeersuarnerup ammaanersiorneqarneranut peqataavoq.
Kalaallit meeqqat inuusuttullu H.K.H. Kronprinsesse Mary ullumi meeqqat kulturikkut ataatsimeersuarneranni ”Children Need Arts – Global Summit”-imi Københavnimi Skuespilhusetimi naapikkamikku inuunerminni puigunaatsorsipput.
Ataatsimeersuarnerup ammaanersiorneqarnerani nipilersornikkut aaqqissuisoqarpoq, tassani kalaallit Uummannami meeqqat illuanneersut aamma Nuummit aamma Kangerlussuarmeersut, Savalimmiunit Danmarkimiillu Naalagaaffeqatigiinnit nipilersoqatigiinnut peqataapput.
Kunngissap nulia tusarnaartitsinerup kingorna inuusuttut piginnaanillit naapippai, eqqumiitsuliornermi kulturikkullu misigisaat pillugit tusagaqarpoq.
Nalinginnaasorujussuuvoq
Agiartartut ilaata 11-nik ukiullip Alma Sølvbladip Nuummeersup, kunngissap nuliata ilassinissaanut periarfissinneqarpoq.
- Nuannerpoq. Inussiarnerpoq, isumaqarpungalu nalinginnaasorujussuusoq.
Najannguaq Qvistip 24-nik ukiullip meeqqat inuusuttullu Naalagaaffeqatigiinneersut allat nipilersoqatigiissuarni nipilersoqatigalugit nuannaraa.
- Sungiusarluarnikuuvugut, allallu Danmarkimeersut Savalimmiuneersullu naapillugit nuannerpoq. Taakku tunuliaqutaat pillugit annertuumik aammalu nipilersoqatigiinni ilikkagaqarpugut. Tusarnaartitsigatta inersuaq ulikkaaqqavoq, Mary issiavinni saarlerniittoq takusinnaavarput, taamaammat pissanganaqaaq.
Najannguaq Qvistip aamma kunngissap nulia Mary ilassivaa.
- Kunngissap nuliata ulluinnarni assamminneqartannginnera misigalugu immikkuullarissuusoq isumaqarpunga. Takugakku pissangasorujussuanngorpunga. Inussiarnerlunilu qungujulavoq, tamattalu isikkut isigaatigut. Nalinginnaarpasittorujussuullunilu eqqissisimasuuvoq.
Kiserliorneq atugarliornerlu sammineqartut
Meeqqat kulturikkut ataatsimeersuarneranni eqqumiitsuliornerup aamma kulturip meeqqanut inuiaqatigiinnullu naleqalersitsilersarneranik anguniagaqarluni sammisaqarpoq, aamma meeqqat inuusuttullu akornanni kiserliornerup atugarliornerullu ajornartorsiutaaneranut qanoq iliuuseqaqataasoqarsinnaanersoq.
Meeqqat kulturikkut ataatsimeersuarneranni nunani tamalaanit oqalugiartartut, ilisimatusartut aamma Norgemit, Sverigemit, Finlandimi, Islandimit, Kalaallit Nunaannit, Savalimmiunit, Danmarkimit, Tuluit Nunaannit aamma USA-mit katersuutsinneqarput, taakku ilisimasat nutaajunerpaat saqqummiuppaat.
”Eqqumiitsuliornerup aamma kulturip meeqqanut inuiaqatigiinnullu naleqarnerulersitsinera” sammillugu ataatsimeersuarnermi meeqqat inuusuttullu ineriartornerat sammineqarpoq, aamma eqqumiitsuliorneq kulturilu qanoq inuiaqatigiinni ajornartorsiutinut aaqqiissuteqaqataasinnaanersoq.
Meeqqat ataatsimeersuarnerat 12. maj tungaanut ingerlanneqassaaq.