Kalaallit meeqqat ilaat gen-imikkut ajoquteqartut paasineqartut
Kalaallit meerartaasa ilaat gen-imikkut, tassa timip pinngoqqaataani, ajoquteqartut, danskit ilisimatusartut paasivaat. Gen-imikkut akornuteqartut virusimik napparsimalernermi meeqqanullu akiuussutissat ilaannik tunineqarnerminni sakkortuumik kinguneqartitsisinnaapput. Issittumi nunap inoqqaavi ilaat allat aamma taama gen-imikkut ajoquteqarput.
Københavnimi Rigshospitalimi ilisimatusartut paasivaat kalaallit meerartaasa ilaat genimikkut, tassa timip pinngoqqaataatigut, ajoquteqartut. Ajoqutaasoq pigigaanni virusinut aamma virusinik uumasunik atuilluni meeqqanut akiuussusersuinernut, meeqqat sanngiinnerupput.
Nutaarsiassaqartitsivik politiken.dk taama allappoq.
Nukappiaraq suli aappiineqanngitsoq napparsimasorujussuaq Rigshospitalimut siorna aallarunneqarpoq. Nakorsat isumaqarsimapput meeraq meningitisertoq imaluunniit tuberkuloseqartoq. Misissuinerilli takutippaat meeraq nalinginnaanngitsumik napparsimasoq.
- Nakorsiartuaqqap misissornerani bakterianik, virusinik parasitinilluunniit nassaanngilagut, aamma kræfternersoq allatigulluunniit timip illersuutaatigut napparsimanersoq misissoratsigu paasisaqanngilagut. Nunat tamalaat akornanni attaveqarfigut qallunaallu immikkut ilisimasallit attaveqarfigaagut, paaserusukkatsigu nakorsiartoq sooq taama napparsimatiginersoq, meeqqat nakorsaat aamma ph.d. Malene Landbo Børresen Rigshospitalimeersoq politiken.dk-mut oqarpoq.
Meeqqap gen-ianik misissuineq taama aallartippoq.
Misissuinermi qulakkeerneqarpoq meeraq gen-imut ajoquteqartoq, taamaasilluni virusimik nalinginnaasumik tunillatsinnermi, virusillu uumasut atorlugit akiuussutissanik, soorlu MFR-imik tunineqarnermi, sanngiinnerulertartoq.
1.500-ngaangata ataaseq taamaattarpoq
Ilisimatusartut kalaallit aaversinneri 4.600-t misissuiffigissallugit aalajangerput. Misissuinerit takutippaat nunatsinni innuttaasut 1.500-gaangata gen-imikkut akornuteqartoq ataasiusartoq. Ilisimatusartut isumaqarput gen-imikkut akornuteqartut amerlagisassaasut, europamimi Danmarkimiluunniit taamaattoqanngimmat. Misissuinerit allat takutippaat Issittumi nunap inoqqaavi allat aamma taama gen-eqartut.
Ilisimatusartut maanna suliniuteqarput meeqqat inunngorneranni aaversinnerit pissarsiarissallugit, qulakkeerumallu meeqqat qassit sumiittullu taama gen-eqarnersut. Gen-imikkut taama akornuteqartut illersuuserniarlugit influenzamut aamma covid-19-imut akiuussuserneqarsinnaapput, virusinik uumasunik atuinani akiuussutissat sanaajummata. Virusimik napparsimalerneq taakkununnga toqqutaasinnaavoq.
Ilisimatusartut erseqqissarpaat misissuinermi akiuussutissanut qunusoqalernissaa angunianngikkitsik, qulakkeerusulluguli misissuinermi kikkut gen-imikkut akornuteqarnersut, ikiorneqalertorniassammata.