siuariartorfiusinnaasoq
Kalaallit IT-mik ingerlatsivik Danmarkimi ingerlalluarpoq
Inu:it, Nuummi qullersaqarfilik, naalagaaffeqatigiit kujallersaanni siuariartorsinnaalluarsoraaq. Taamaattumik pisortaq Martin Gjødvad piffissap ilaani Danmarkimut nuussaaq Nunatsinnullu uteqattaartassalluni
Danmarkimi siuariartornissamut periarfissaqarluarpoq.
Taamatut naliliivoq ingerlatsivik Nuummi qullersaqarfilik Inu:it.
Kalaallit IT-mik ingerlatsiviat taanna 2013-imi novembarimiilli Danmarkimi immikkoortortaqarfeqalersimavoq tappavanilu siuariartupiluulersimalluni.
Pisortaq Martin Gjødvad naapertorlugu Danmarkimi immikkoortortaqarfiup ullumikkut Inu:it-p siunnersuinikkut kaaviiaartitaasa 20 procentiisa missaanniittut tigummivai, anguniagaavorlu Danmarkimi immikkoortortaqarfik Inu:it-p Kalaallit Nunaanni immikkoortortaqarfiatut angitigilissasoq.
Gjødvad ukiuni kingullerni 20-ni Kalaallit Nunaanni IT-mik ingerlatsivimmik anginerpaamik pilersitsisimavoq.
Ilimanaateqarluarnerarpaa
– Ilimanaateqarluarsoraarput, ineriartornerlu sukkatsisarniarlugu aasarumiit Danmarkimi aallaaveqassaanga, piffissarli atugara Danmarkimiinninnut Kalaallillu Nunaanniinninnut assigiissumik atussavara. Soorunami allanngortoqassaaq, aamma ilaqutariinnut, tamattali unammilligassat nutaat pissanganartutut isigaavut, Martin Gjødvad oqaluttuarpoq.
Jyllandip avannaani Thistedimi Inu:it ullumikkut arfineq-marlunnik sulisoqarpoq, allallu tallimat Danmarkimi sumiiffinni allaniillutik. Ingerlatsivik manna tikillugu pingaartumik IT-mi aqqutissarsiornermi siunnersuinermik ingerlatsisimavoq, ingerlatsivillu nutaatut qaammammi matumanit nammineq hosting-eqarfimminik pilersitsiniarpoq, tassanilu atuisussaq siulleq nalunaareersimavoq tallimallu tullinnguullutik.
Inu:idt Nuummi 40-nik, sinerissamilu allanik sisamanik, sulisoqarpoq.