isikkamik arsaanneq

Kalaallit isikkamik arsaattartut inuuniutigalugu unammisartuulernissaat GBU-mit anguniarneqarpoq

Isikkamik arsaattartut kattuffiata siunissamut pilersaarutini pillugit ataatsimeeqqammerpoq. Fifami ilaasortanngornissaq kiisalu inuuniutigalugu isikkamik arsaattartoqalernissaa anguniarneqarpoq

GBU-mi siulittaasoq John Thorsen - assi toqqorsivimmit

Isikkamik arsaattartut kattuffiat (GBU) siunissamut pilersaaruteqarpoq.

Nunat tamalaat isikkamik arsaattartut kattuffiannut Fifamut ilaasortaalernissaq anguniarneqarpoq. Inuuniutigalugu isikkamik arsaattartoqalernissaa aamma anguniarneqarpoq.

Anguniagassat GBU-p siulersuisa Kangerlussuarmi ataatsimiinneranni saqqummiunneqarput.

- Ernerit paniilluunniit europami isikkamik arsaannermi inuuniuteqarluni unammisartuusoq takorlooriaruk. Kalaallit Nunaat VM-imut anngunniuuteqataasoq takorlooriaruk. Anguniakkat anguneqassappata Kalaallit Nunaanni isikkamik arsaattartut aamma innuttaasut ataqatigiittariaqarput, GBU-mi siulittaasoq John Thorsen siulersuisut sinnerlugit oqarpoq

GBU: AWG aamma Island Games naammanngillat
Anguniakkat qanoq anguneqarsinnaanersut ataatsimiinnermi eqqartorneqarput.

- GM-ertitsisarnerit, sungiusaasunik dommerinillu sungiusaasarnerit allanngortinneqartariaqarput. Timersoqatigiiffinnut ilaasortaasunut attaveqaqariaaseq allanngortinneqartariaqarpoq ammanerulersillugu. Sulianut tamakku ilaassapput.

- Inuit tamarmik naammagisaannik iliuuseqarsinnaanngilagut. Kisianni Arctic Winter Gamesimut Island Gamesimullu peqataasarneq naammaginngilarput. Timersortartutut eqqarsartariaaseqarpugut, anguniagaqarusuppugummi, GBU-mi siulittaasoq oqarpoq.

Meeqqat meeraanerannit inersimasunngornissaannut sulineq GBU-mit sulissutigineqassaaq. Aamma ilinniartitaanerup qitiutinneqarnissaa pingaartinneqassaaq.

- Suliassanik pingaarnersiuisoqartariaqarpoq siuariartoqassappat. Taamaasilluni GBU aamma siumut ingerlariaqqissinnaassaaq, John Thorsen oqarpoq.

Powered by Labrador CMS