Kalaallit inuusuttut inuuniarnermikkut atugarissaanngitsut Københavnimi naapittarfittaartinneqarput

Café Ilik aanngajaarniutinik atuiffiussanngilaq, kalaallillu inuusuttut tassani eqqissisimaarsinnaapput ikiorniarneqarsinnaallutillu. Kajumissutsiminnik suliaqartut isumaginninnermilu suliaqartut aqqusiniinnarmiititsinatik inuusuttunut toqqisimanartumik sumiiffissaqartitsiumapput.

Kalaallit ornittagassaat, Sundholmip Christianiallu aanngajaarniutinik atuiffiusut saniatigut, aanngajaarniutinik atuiffiunngitsoq periarfissaq nutaaq. Café Ilik februaarip aqqarnani ammarneqartussaq taama siunertaqarpoq.

- Kalaallit inuusuttut inuunerminni atugarliortut sapaatip akunneranut marloriarlutik maani naapittarsinnaapput eqqissisimaariartorlutik, aammali ikiorneqarnissamik neqeroorfigitissinnaassallutik, Mille Schiermacher Københavnimi Kalaallit Illuutaanniittoq, oqaluttuarpoq.

Sermitsiaq.AG-mi allaaserisariikkatsitut kalaallit inuusuttut amerlingaluttuinnartut Københavnimi aanngajaarniutinik atuiffiusuniittarput. Taama ineriartortoqarnerata kingunerisaanik café siunnersuisarfillu pilersinneqarput, sulinermi pisariaqartitsisunik aamma ujartuisoqartassaaq.

Ujartuilluni sulineq

Ivalu Lund suliami ujartuisuusassaaq, taassumallu kalaallit inuusuttut Københavnimi najugaqartut sumiiffiinukarluni attaviginiartassavai – aamma unnukkut. Suliaq ilungersunarsinnaasoq ilisimalluarpaa.

- Uteriitsuusinnaaneq pisariaqarluinnarpoq. Siullermik itigartinneqaruma iluatsitsisimassaanga, tassami attavigisassara taannaasoq paasissavara – kingorna uterfigeqqiinnarumaarpara, Ivalu Lund oqarpoq.

Misissuinerup Kalaallit Illuutaannit ataqatigiissaarneqartup takutippaa inuusuttut pisariaqartitsisut ikiortissarsiorneq ajortut imaluunniit aatsaat kingusissukkut ikiortissarsiortartut.

- Inuusuttut pakatsisitaajuartarsimapput, attaveqarfigilernissaannullu sivisusinnaalluni, Mille Schiermacher ilaliivoq.

Ujartuillunilu sulinermi inuusuttut attavigipallannerusarnissaat siunertaavoq – atornerluinermut pivallaannginnerani.

- Cafémi inuusuttut nerisassaqartinneqassapput, kaffesorsinnaapput nuannisaaqatigiillutillu – eqqissisimaarsinnaapput, Ivalu Lund oqarpoq.

Kajumissutsiminnik suliaqartut allatut attaveqalersinnaapput

Cafép ammanerata nalaani siunnersuisunik kajumissutsiminnik suliaqartunik isersimasoqartuaannassaaq. Siullermik inuusuttut oqaloqatiginiarlugit nuannisaaqatiginiarlugillu peqataasassapput. Amalie Lolk Mortensen kajumissutsiminik takkuttassaaq.

- Kajumissutsimik suliaqartuusugut isumaginnittuniit allatut attaveqalersinnaavugut. Inuusuttut paasigunikku inuit allat sunngiffimminni ilagisinnaagaatsit, tamanna isumaqartorujussuuvoq, nassuiaavoq. Amalie Lolk Mortensen siunnersuisutut ukioq ataaseq affarlu sulereersimavoq. Inuusuttut Cafémiittussat siunnersorneqarnissamut piareersimappata, nammineq aamma piareersimavoq.

- Tassani inuusuttut sunik ilinniagaqarsinnaanersut eqqartorneqartassaaq, taavalu qanoq aallartinniarsinnaanersut qanorlu naammassinnissinnaanersut, Amalie Lolk Mortensen nassuiaavoq.

Ataasiakkaarlutik anguniagaqartassapput

Siunnersuisussaq oqaloqatigineqarsinnaavoq, danskillu aaqqissuussaanerat pillugu ikiuussinnaalluni. Isumaginninnermut tunngasut pillugit isumaginninnermut siunnersortit ikiuunnissaminnut piareersimassapput.

Mille Schiermacher nassuiaavoq inuusuttut ataasiakkaarlugit anguniagassaannik inissiinissaq pingaaruteqartoq.

- Ilaasa iluatsinniagassatut anguniagarisinnaavaat sapaatip akunneranut ataasiarlutik Cafémukartarnissartik, atornerluinermi inuunertik qimalaarlugu. Allat siunnersorneqarnermik aallartitsisinnaapput imaluunniit ilinniakkamik aallartitsillutik.

Inuusuttorpassuit Københavnimut pigaangamik Christiania imaluunniit Sundholm ornittagannaarisalertarpaat. Mille Schiermacher neriuppoq Café Ilik allaanerusumik periarfissatut isigineqalerumaartoq.

Café Ilik ataasinngornermi pingasunngornermilu nalunaaqutaq ualikkut sisamaniit unnukkut qulingiluat tungaannut ammasassaaq.

Sammisaq pillugu uani atuarnerusinnaavutit.

Powered by Labrador CMS