Skip to main content

Kalaallit inuusuttuaqqat atisaqarpiaratik nittarsaattut

Naligiissitaanermut siunnersuisooqatigiit ambassadøriisa Arpaartit inuusuttuaqqat inappaat atisaqarpiaratik internetimi nittarsaattaqqunagit

Piffissami kingullermi kalaallit inuusuttuaqqat arnat angutillu atisaqarpiaratik Facebookimi imminnut saqqummiuttalerput. Facebookimi quppernerni Niviaaluit-ni aamma Nukappissani assitik saqqummiuttarpaat ilaasa kiinnatik ilisarnarunnaarsarnagit. Naligiissitaanermut siunnersuisooqatigiit ambassadøriisa Arpaartit tamanna isumakulunnartoqartippaat ilimagilluinnarpaallu inuussuttuaqqat ilaat 18-it inorlugit ukioqartut.

Nunarsuarmi arnat ulluat arfininngornermi nalliussineqassaaq. Nunatsinni naligiissitaanermut siunnersuisooqatigiit ukiormanna aalajangiuppaat pinaasertumut arneriniarneq sexchikane immikkut oqaluuseritinniarlugu. Maannalu isumaluutit ilaneqarput Facebookimi qupperneq Niviaaluit februaari aallartilaartoq ammarneqarmat. Kalaallit niviarsissat arlallit atisaqarpiaratik assiminnik tassunga ikkussuipput ilaallu kiinartik ilarsarnarunnaarsarnagu ikkussisarput. Maanna aamma kalaallit nukappissat namminneq aamma qupperneqalerput.

- Arpaartit ilimagilluinnarpaat niviarsiaqqat nukappiaqqallu ilaat tassanngaannaq pileritsariasaarnikkut taamaasiorsimassasut. Eqqarsaatigisimagunanngilaat assit taakku qaqugorsuarmut internettimiittussaasut Facebookimi quppernerit taakku matuneqassagaluarpataluunniit, Naligiissitaanermut siunnersuisooqatigiit allattoqarfianni pisortaq Inge Olsvig Brandt Sermitsiaq.AG-mut oqarpoq.

Angajoqqaat akisussaaffiat
Taassuma qularinngilaa niviarsiaqqat nukappiaqqallu ilaat 18-it inorlugit ukioqartut taamalu suli angajoqqaaminnit oqartussaaffigineqartut.

- Angajoqqaanut assut kaammattuutigerusupparput eqqumaffiginiaqqullugu qitornatik internettimi susarnerat. Taamatut nittarsaannerup kinguneranik niviarsiaqqat nukappiaqqallu atornerloriarneqarsinnaapput, Inge Olsvig Brandt oqarpoq.

Taassuma erseqqissarpaa Kalaallit Nunaanni naligiissitaanermut siunnersuisooqatigiit killilersornianngimmassuk inuit Facebookimi kusanasaarlutik saqqummersinnaanerat. Maanna kaammattuutigaat matuma oqaluuserineqarnissaa pinaasertumut arneriniartarnerup ataani oqaluuserisat ilaattut nunarsuarmi arnat ulluata malunnartinniarneqarnerani.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER