Kalaallit inussuttut Europamut qimuttuitsunut allagartanik akeqanngitsunik qinnuteqarsinnaapput
Suliniut DiscoverEU inuusuttunut 35.000-nut qaammammi ataatsimi Europamut takornariarnissamut qimuttuitsunut allagartanik akeqanngitsumik agguaassaaq. Qinnuteqarnissamut killigititaq ullut arfineq-pingasut qaangiuppata qaangiutissaaq, kalaallillu inuusuttut Europami akeqanngitsumik angalanissamut iluatsitsisinnaasut ilagaat.
EU-kommissionip inuusuttut nunanut ataatsimoorfiusunut ilisimasaat annertuserusuppaat. Taamaammallu ukiut tamaasa aasaanerani atuanngiffeqarnerup nalaani Europami angalanissamut billetinik 35.000-nik agguaasoqartarpoq.
Kalaallit Nunaat nunat qeqertallu imarpik ikaarlugu tikinneqarsinnaasunut ilaavoq, taamaattumillu kalaallit inuusuttut paasisassarsiorlutik Europami qimuttuitsunik angalanissamut allagartanik akeqanngitsunik qinnuteqarsinnaapput.
Qimuttuitsunut allagartaq qaammammi ataatsimi Europami killeqanngitsumik angalanissamut atuuttoq, DSB-mi nammineq pisiaralugu 4000 koruunit missaannik akeqarpoq. Peqataasussat toqqarneqartut aamma DiscoverEU-mik inuusuttut allagartaannik pissarsissapput, taanna kulturikkut tikeraarnernut, ilinniarluni sammisanut, timersornernut, nunami aalajangersimasumi angallanneqarnermut, unnuinermut, nerisaqarnermut allanullu akikillisaavigineqartartoq.
Unnuinermi, nerisaqarnermi misigisaqarnermilu akikilliliinerit
Inuusuttut EU aamma nunat naalagaaffinni peqatigiinni kulturit assigiinngitsut ilikkagaqarfiginerisa saniatigut, EU-p atajuarnerulersinnissaanik eqqumaffiginninniarneq ukkatarineqassaaq. Aammattaaq DiscoverEU Culture Routemik taaguutilimmik peqarpoq, tassani tikitassat assigiinngitsut kulturillu ataatsimut misigisassaqarfiupput, illut titartarneqarneri, nipilersorneq, assilialiorneq, isiginnaartitsineq, atisat, ilusilersuineq allallu ilaatinneqarlutik.
Peqataasut akikilliliiffigineqarnermut allagartamik 40.000-t sinnerlugit angallannermut, kulturimut, unnuinermut, nerisaqarnermut, timersornermut allanullu nunanit peqataaffiusunit akikilliliiffigineqartumik pissarsissapput.
2018-imili inuusuttut 916.000-t angalanermut allagartanik 212.700-nut qinnuteqarsimapput: Angalanernit misissuineq kingulleq naapertorlugu qinnuteqartut 72 procentii siullermeerlutik nunaminnit qimuttuitsunik aallarput. Peqataasullu amerlasuut aamma angajoqqaatik imaluunniit inersimasut siullermeerlutik peqatiginagit aallarput, amerlanerillu nammineersinnaanerulersimallutik akissuteqarput.
Kommissioni nungusaataanngitsumik qimuttuitsunik angalanernut kajumissaaripput. Kisianni nunap immikkoortuinit ungasinnerusunit, imarpik qulaallugu tikinneqarsinnaasuneersut qeqertallu immikkut atugassaqartinneqarput, kommissioni nittartakkamini allappoq.