nanoq beer
´Kalaallit´ immiaaraat Walesimi immiorneqarsimapput
Jørgen Wæver Johansenip Gerhardt Petersenillu immiaaqqat Tuluit Nunaanni immiorneqartut kalaallit immiaaraattut tuniniarpaat. Sermersuup aannerata ernganik angallammik nassittaratsigik, taakkua tunngavilersuipput
Ilumoortoq saneqqunneqalaarsimavoq kujataani politikerit marluk Jørgen Wæver Johansenip Gerhardt Petersenillu immiaaraatitik Nanoq Beer ´kalaallit´ immiaaraattut tuniniarmatigit.
Tassami selskabip immiaaraliai kimittuut kilometerit tusinit aralallit ungasissusilimmi immiorneqarsimapput, tassa tuluit nuaanni qeqertani Wales-imi, pisortaq Atassutillu siulittaasua paasissutissanik taakkuninnga saqqummiussiffigineqarami pinaasertunnguamik nassuerpoq.
– Narsami tunisassiarineqarput, tassanngaanniillu Walesimut nassiunneqartarput tassani puiaasanut liiterip affaanut maqinneqartarlutik, taavalu Danmarkimi tuniniarneqarlutik, taanna oqarpoq.
– Paasisinnaavara imeq immiaaraanngitsoq Walesimut nassiuttarissi?
– Aap, piffissami kingullemri taamaasiulerpugut, uagullu najoqqutassaativut atorlugit immiortarput, taanna oqarpoq.
– Piffissap annersaani suna Walesimut nassiuttarpisiuk, imeq immiaararluunniit?
– Imeq, Gerhardt Petersen uppernarsaavoq.
Nunattamiuna imia
Nanoq Beer-imi siulersuisunut siulittaasup Kommune Kujallermilu borgmesterip Jørgen Wæver Johansenip, Siumut, isumaqanngilaq ileqqorluttuliornerusoq immiaaqqap Walesimi immiorneqartup kalaallit immiaaraattut tuniniarneqarnera.
– Imeq Narsamiit Tuluit Nunaannut nassiuttarparput taavalu Tuluit Nunaanni kalaallit immiaaraannik immiortarput, kingornalu immiaaqqat Danmarkimut Nunatsinnullu eqqunneqartarlutik, Jørgen Wæver Johansen oqarpoq.
– Aamma Narsami immiaaraliortoqartarpa?
– Aap, immiaaraliortoqartarpoq.
– Sumi immiaaraliortoqarneruva?
– Tuluit Nunaanni. Narsami suliniut iluamik aallartinngisaannarsimavoq, taamaattumik tassani annikitsuinnarmik immiaaraliortoqarpoq. Fadøl-inik tunisassiorneq misilissimavarput, Jørgen Wæver Johansen oqarpoq.
– Immiaaraq Walesimi immiorneqartoq qanoq isillusi kalaallit immiaaraattut taasinnaavisiuk?
– Taamaasiorsinnaavugut pissutigalugu immiaaraliarineqartut imermik Narsameersumit immiorneqarmata, taamaasillunilu kalaallit immiaararaat, siulersuisut siulittaasuat oqarpoq.
Nanoq Beer akiliisinnaajunnaarpoq
Immiaaraliorfiup immaaraataata tuniaanerpaap ´Mammut Pale Ale´-p usassaarutigineqarnerani allassimavoq: ´Una Pale Ale Kalaallit Nunaanneersoq peqqissaartumik kalaallit erngannik minguinnerpaamik sananeqarsimavoq - sermersuup aanneranik akullugu kiisalu immiassat, sungarnitsussat qapuillu pitsaanerpaat atorlugit´.
Niuernikkut iluatsitsiniartoqaraluartoq immiaaqqat ima tunitsivissakitsigaat selskabi akiliisinnaajunnaartutut piumasarineqarsimalluni akileraartartunut annaasaqaaterujussuarmik.
Pilersaarutit malillugit Gerhardt Petersen marlunngormat eqqartuussivimmittuussaasimavoq, pissutigalugu selskabip inatsisitigut piumasaqaatitut 2012-imut ukiumut naatsorsuutit tunniussimanngimmagit, taamaattumillu Inuussutissarsiutinut Aqutsisoqarfimmit pinngitsaalisamik atorunnaarsinneqarnissaa piumasarineqarsimalluni.
Selskabi ukiuni kingullerni uninngasimavoq akiligassaannaqarluni, taamaattumik akiliisinnaajunnaartutut nalunaarutigineqarnissaa qularnanngilaq.
Immiaaraliorfik akiliisinnaajunnaartoq pilugu AG-p saqqummersumi annertunerusumika tuarit. Aviisi pisiariuk uani: