Kalaallit ilusilersuisartut mukluksinik kamippaliortut
Canadami kamippaliorfik Manitobah Mukluks kalaallinik marlunnik ilusilersuisartunik suleqateqalerpoq. Tamanna kamippannik mukluksinik kalaalerpaluttunik marlunnikkinguneqarpoq.
Kamippaliortuupput eqqumiitsuliortoq kakiuisartorlu Paninnguaq Lind Jensen kiisalu ilusilersuisartoq Nickie Isaksen.
Atuagassiaq Arnanut taama allappoq.
Paninnguaq Lind Jensen oqaluttuarpoq Canadamiut kamippaliaata mukluksip kalaallillu kamiata kattunnerat qanoq issanersoq ilusilersukkamini eqqarsaatigisarlugu – taamaattumik
mukluksiliamini avittanit naqitat ilaatissimavai.
- Inuit allamut nuuttarnerat pillugu atuarsimaqaanga – qanoq kulturerput nunat inoqqaavinik allanik naapitaqarnikkut ilusilersorneqartarlunilu sunnerneqarsimanersoq, ilusilersukkannilu tamanna isumassarsiffigaara, Paninnguaq Lind Jensen nassuiaavoq.
Nickie Isaksen aatakkuminit isumassarsiorsimavoq.
- Aataga qajartortarpoq aanagalu igaffimmini uloqarluni. Qajaq ululu naggueqatigiinni inunni arnat angutillu pinnissusaannut takussutissaapput.
Manitobah Mukluksimit kamippaat Kalaallit Nunaanni qangali nuannarineqarsimapput, aatsaalli siullermeertumik kalaallisut ilisarnaaserlugit nioqqutaalerput.
Kamippaat mukluksit pillugit atuagassiami Arnanut-mi atuarnerusinnaavutit. Atuagassiaq uani pissarsiariuk: