Kalaallit ikittuinnaat Pituffimmi sulisuusut

Pituffimmi Vectrus Servicesimi sulisut 16 procentiinnaat kalaaliupput. Naalakkersuinikkut sulisut 50 procentiunissaannik anguniakkamit ungaseqaaq. IA sinnerlugu Folketingimut ilaasortap tamanna ernummatigaa nutaamillu kiffartuussinissamut isumaqatigiissut sioqqullugu sulinermi pissutsit nalunaarusiarineqarnissaat kissaatigalugu.

Pituffimmi kiffartuussinissamut isumaqatigiissut maannakkorpiaq neqeroorfigineqarsinnaavoq. Naatsorsuutigineqarpoq ungasinngitsukkut aalajangiivigineqassasoq. Vectrus Services Permagreen peqatigalugu suliassamut neqeroorpoq. Tamatuma saniatigut siusinnerusukkut kiffartuussinissamut isumaqatigiissuteqarsimasoq Greenland Contractors Greenland Holding peqatigalugu suliassamut neqeroorpoq.

Pituffimmi qallunaat qullersatut attaviata Sigrid Hansenip atorfini ima nuannaritigaa atorfeqarnini ukiuni marlunniit pingasunut sivitsorniarlugu qinnuteqaqqammerluni, inuilli tamarmik Kalaallit Nunaata avannarpasinnersaani sakkutooqarfimmi avinngarusimasumi sulinissartik taama nuannaritiginngilaat.

Aviisi Sermitsiaq taama allappoq.

Atorfippassuuppummi inuttalerneqanngitsut minnerunngitsumik kiffartuussinissamut isumaqatigiissuteqartumi Vectrus A/S-imi, sulisussarsiortuartumi. Maannakkut usilerinermi sulisussanik, sarfalerisunik, taartissanik isumaginnittussanik, inuinnaat qamutaannut assakaasulinnut mekanikerinik, mittarfimmi mekanikerinik kiisalu allaffissornikkut teknikkikkullu sulisussanik pissarsiorpoq.

Sulisut nikerartupilussuit

Atorfippassuit inuttaqannginnerat Inuit Ataqatigiit sinnerlugit Folketingimi ilaasortap Aaja Chemnitz Larsenip ernummatigaa:

Naammattunik sulisoqarnissami sulisoriinnarnissaannilli tigussaasunik ajornartorsiuteqartoqarneranik takussutissaapput – aammali immaqa sulisoqarnikkut pissutsinik tunngaviusumik ajornartorsiuteqartoqarpoq, Aaja Chemnitz oqarpoq nangillunilu:

Arlalinnit tusarpara Pituffimmi sulisut nikerartupilussuusut. Takusinnaavaralu piffissami sivisujaami atorfippassuit inuttassarsiuunneqartut. Tamanna arlalitsigut ajornartorsiutaavoq. Pingaarnertut sakkutooqarfimmi atorfiupput ataatsimut soqutigisaqarfigisavut ingerlajuartussat soorlu silasiorfik mittarfillu. Aappaattut sulisussanik sulisoriinnarnissaannillu ajornartorsiuteqarneq sulinermi atukkat pitsaanngitsuunerannut takussutissaagajuttarput. Pingajuattut nunatsinniit naalakkersuinermik suliaqartugut kissaatigaarput sakkutooqarfik nunatta karsianut iluaqutaassasoq assersuutigalugu kalaallit sulisoralugit ilinniartoralugillu. Ernummatigeqaaralu matumani maannakkut isumaqatigiissummi neqeroorut ima appasitsigisoq ingerlatsinissamut akissaqarnissat qulakkeerneqarani.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS