Kalaallit folketingimi ilaasortat Ukraine pillugu: Akuersaarneqarsinnaananilu ajorluinnarpoq
Kalaallit folketingimi ilaasortat marluullutik Ukrainemi pisoq qanimut malinnaaffigaat.
Ruslandip sisamanngornerup unnuaani Ukraine piffissami sivisuumi aaqqiagiinngissuteqartoqareersoq saassussimavaa.
Nalunaarutigineqartut suli nalorninartortaqarput, Ruslandilli nuna sumiiffinnit assigiinngitsuniit saassussimannguatsiarpaa.
Taamatut pisoqarnera kalaallinut Folketingimi ilaasortaasunut marlunnut eqqarsaallatsitsisimavoq:
- Ukrainemi innuttaasut misiginneqatigaakka, taamatullu ineriartortoqarnera maanna Ukrainermik saassusinermik kinguneqartoq malinnaaffigilluarsimavara. Pisoq akerlerilluinnarpara, assullu ernunamartillugu, Aaja Chemnitz Larsen (IA) Sermitsiaq.AG-mut allakkatigut oqaaseqaateqarluni allappoq.
Siumut sinnerlugu folketingimi ilaasortap ki-Matilda Høegh-Damip (S) oqaluttuaraa, aaqqiagiinngissuteqartoqarnera malinnaaffigilluarsimagaluarlugu, Ruslandip saassussinera tupaallaatigisimallugu. Tamatumunnga peqatigitigillugu inuit eqqissisimaqquallugit kaammattuutigaa:
- Killeqarfiit ataqqineqannginnerat ajorluinnartoq
- Inuit arlallit sorsunnersuup pingajuat aallartittoq Facebookikkut allassimasut takuara. Pissusiviusut isigisariaqarpavt, matumanilu Ruslanip Ukrainemik saassussinera pineqarpoq.
- Tamanna imminermini ajorluinnartuuvoq, tassami nunat allat namminersortuunerat killeqarfiilu ataqqineqanngillat. Nunarsuarmi sumiikkaluaraanniluunniit tamanna ataqqineqartussaavoq, Aki-Matilda Høegh-Dam Sermitsiaq.AG-mut oqarpoq.
IA-mi politikerip Aaja Chemnitz Larsenip ilanngullugu oqaatigaa, aaqqiagiinngissuteqarnerup Issittumut siaruaatinnginnissaata qulakkeerneqarnissaa pingaartitaralugu:
- Rusland Issittumut ilaavoq, uannullu pingaaruteqarnerpaavoq, Issittumi eqqissisimasoqartuarnissaata qulakkeerneqarnissaa aamma nunarsuarmi sumiiffinni allani sorsuttoqarnerata Issittumi inuunitsinnut sunniuteqannginnissaata qulakkeerneqarnissaa, taanna oqarpoq.
Larsen: Mianersortoqassaaq
Aaja Chemnitz Larseni aperineqarami, Kalaallit Nunaat Ruslandimut pillaatitut iliuuseqartunut peqataaniannginnersoq, imatut oqarpoq:
- Tamanna Naalakkersuisut aalajangingassaraat, mianersortoqartariaqarporli. Ukrainemi maanna pisoq Issittumi suleqatigiinnitsinnut sunniuteqarnissaa ilimaginngilara.
- Pillaatitut iliuuserineqarsinnaasoq tassaasinnaavoq, aalisakkanik tunisaqartarnerup unitsinneqarnissaa, tamannali Ruslandimut sakkortuumik eqquinavianngilat. Isumaqarpunga eqqarsarluartoqassasoq Danmarkilu peqatigalugu ataqatigiissaarisoqassasoq.
Pisumi Kalaallit Nunaannit qanoq iliuuseqartoqassanersoq eqqarsaatigalugu Aki-Mathilda Høegh-Damip oqaatigaa, Naalakkersuisut Danmarkimilu naalakkersuisut pisumik qanimut malinnaanissaat inatsisartunillu peqataatitsisarnissaat pingaaruteqartoq.