Kalaallit filminut toqqorsiviat aallartilluartoq

Nittartakkami filminut toqqorsivik, inuiaatisaat.gl, Kalaallit Nunaannut inuiattut ullorsiornermi tunissutigineqartoq alakkarterneqarluarluni aallartilluarpoq. Tunissutigineqartorlu tigulluarneqartutut isikkoqarpoq.

Ánorâk Filmimi piginneqataasoq 'Inuiaat Isaannilu' ingerlatseqataasoq, Emile Hertling Péronard tusagassiuutinut nalunaarummini allapoq.

Taassuma oqaluttuaraa inuiattut ullorsiortoqarnerani saqqummersineqarnerata kingorna inuiaatisaat.gl 6.000-ingajannik alakkarneqarsimasoq aamma 35.000-it sinnerlugit qupperneqarsimasoq. Kisianni atuisut nittartakkami isersimasarnerisa sivisussusaat nuannersumik tupaallaatitaavoq. Amerlassusaat ajoriinnagassaanngilaq, saqqummersinneqarnera nunatsinni tusagassiorfinnit kisimi saqqummiunneqarnera eqqarsaatigalugu.

Isertut sivisussusaat annertooq
Filminik saqqummersitsivimmut Ánorâk Filmimut Inuiaat Isaannut suliarinnittunut tupaallannarnerpaavoq, nittartakkamut isertut agguaqatigiisillugu minutsit qulingiluat sinnerlugu isersimasartut, tamannalu annertoqaaq.

Google Analytics kisitsisinik taakkuninnga naatsorsuisoq Ánorâk Filmimut paasititsivoq, silarsuami nittartakkat naatsorsuiffigisakkatik procentit marluinnaat missaat agguaqatigiisillugu minutsit tallimat sinnerlugit nittartakkami isersimasoqartaput. Taakkunanngalu annertunerpaartaat - tassa 70 procentii - agguaqatigiisillugu minutsit pingasut ataallugit isersimasoqartarput.

- Kisitsisit Google Analyticsimeertut ersersippaa, uagut Kalaallit Nunaanni oqaluttuarisaanitsinnut soqutiginnittorujussuusugut. Sungiusimavarput oqaluttuarisaanerput allaniit oqaluttuarineqartartoq - minnerunngitsumik filmitigut - maannali nammineq oqaluttuarisaanermik ilisimatuugut, atuakkiortugut filmiliortugullumi Kalaallit Nunaata oqaluttuarisaanerani aallutaqaleriartorput, Emile Hertling Péronard oqaluttuarpoq.

- Kalaaliulluni tamakku oqaluttuat imminut ilisarisinitsinnut uppernarnerusutut ittut malunnarpoq. Saqqummiulluarneqarluta misiginerusarpugut oqaluttuarisaanerput ilutsinnit oqaluttuarineqaraangat, Emile Hertling Péronard oqarpoq.

Siunissaq qularnartoq
'Inuiaat Isaat' filminik Kalaallit Nunaata oqaluttuarisaaneranut tunngasunik 18 tiiminik sinnilinnik sivisussusilinnik imaqarpoq, nittartakkallu kikkunnut tamanut atorneqarnera akeqarani. Maannakkullu immiussanik oqaluttuarisaanermut tunngasunik filminik digitaliserigassanik ikkussassanik piareertoqalereerpoq, filmillu imarisaasa oqaluttuassartai nutaanik ilaartorneqartuarput. Ánorâk Film suleqatigilersinnaasaminik maanna arlalinnik oqaloqateqarpoq, nittartakkap ingerlanneqarneranut tapeeqataasinnaasunik.