Kalaallit filmiliaat takinngitsoq akissarsitinneqarpoq

Inuk Jørgensenip filmiliaa takinngitsoq "Home", Burbankimi, Los Angelesimiittumi, Independent Short Awardsimi arlalinnik akissarsitinneqarpoq.

Filmiliaq takinngitsoq 'Home' Inuk Jørgensenimit suliarineqartoq, Burbankimi Los Angelesimiittumi filmilianik takinngitsunik takutitsinertalimmik festivalertoqarnerani, Bedste Dokumentaritut (Piviusulersaarutitut pitsaanerpaatut, aaqq.) sølvinnatsinneqarpoq. Taassuma saniatigut killorneqarnera nersualaarneqarpoq assilineqarneralu nersorniarneqarluni.

Filmiliaq Kujataani silap pissusiata allanngoriartornera pillugu oqaluttuartuuvoq. Ukiuni qulini peqanngereerluni filmiliortartoq angerlarpoq, allanngortoqangaatsiarsimasorlu takusinnaallugu. Inuk Jørgensenip filmiliaq, kingulissatta silap pissusiata allanngoriartorneranit qanoq sunnerneqartigissanersut pillugit aarlerisaarutitut atorpaa.

- Kalaallit Nunaata avatangiisaa tunuliaqutaralugu filmiliorneq imminermini immikkut pisinnaatitaaffiuvoq aammalu oqaluttuamisut tunngavittut atoraanni ajornanngitsunnguulluni, Inuk Jørgensen qujassuteqarluni oqalugiarnermini, aqagu pisussami oqassamaarpoq.

- Filmi tassaaginnanngilaq assit assigiinngitsut katitigaanerat. Filmi tassaavoq oqaluttuaq. Uku akissarsiaritinneqartut takutippaat, ‘Home’ assiinnaanngitsut kusanartut, aammali oqaluttuaasoq pisariaqartoq, tamannalu nuannaarutigaara maniguullungalu.

Filmiliaq ukioq manna aatsaat nersornaaserneqanngilaq. Novembari qaammat Independent Talents International Film Festivalimi filmitut pitsaanerpaatut taaneqarpoq.

Burbankimi festivalertoqareerpat Europami filmfestivalini filmiliaq takutinneqassaaq.

Filmiliamut ilisarititsineq uani ataani takusinnaavat:

Powered by Labrador CMS