Kalaallit filimiliaat festivalimi takuneqarnerpaasimasoq
Københavnimi filminik piviusulersaarutinik takutitseqattaarneq, CPH:DOX, coronavirusi pissutigalugu intenetsikkut ingerlanneqasimavoq, tassanilu kalaallit filmiliaat ”Kampen om Grønland" takuneqarnerpaasimalluni, aaqqissuisut ilisimatitsipput.
Ukioq manna filminik piviusulersaarutinik takutitseqattaarneq, coronavirusi unammillernartoqartitsigaluartoq iluatsilluarsimavoq, tassa aaqqissuisut isiginnaartoqarluni takutitsinissaraluamut taarsiullugu internetsikkut taamaallaat takutitsisariaqarsimagamik.
Isiginnaartumut 8000-inut bilitsit 65.000-it tunineqarsimapput, sulilu ujartuisoqarluni, tusagassiorfinnut nalunaaruteqarnermi ilisimatitsissutigineqarpoq.
-Nuannaarutigalugulu qujamasuutigaarput, festivalip internetsikut misilillugu takutitseqataarnera tigulluarneqarsimammat. Sapaatip akunnerisa pingasut matuma siorna aniguissanerluta nalusimavarput, ullumikkullu misigisimavugut, isiginnaartuvut peqatigalugit piffimmut nutaamut pisimalluta, pisortaaneq Tine Fischer oqarpoq.
Isiginnaariat danskit filmiliaat amelanerpaat tigulluarsimavaat. Festivalimi takuneqarnerpaanit tallimaasunit danskit filmiliaat sisamat isiginnaartoqarnerpaapput: ’Kampen om Grønland’ Kenneth Sorentomit filmiliarineqatoq ammaanersiornermi isiginnaartoqarnerpaasimavoq, tusagassiorfinnut nalunaaruteqarnermi ilisimatitsissutigineqarpoq.
2020-mi filmit takuneqarnerpaat tallimat tassapput:
- Kampen om Grønland
- Songs of Repression
- Capital in the 21st Century
- The Kingmaker
- I Love You I Miss You I Hope I See You Before I Die
CPH:DOX 2020 apriilip 30-ata tungaanut ingerlanneqassaaq. Intenetsikkut isiginnaarneqarsinnaasut uani takuneqarsinnaapput, cphdox.dk/online