Kalaallit eqqumiitsuliaataat nunatsinnut utertinneqalersut

Statens Museum for Kunstimit, Fonden for Grønlands Nationalgalleri for Kunstimit aamma Nuummi Eqqumiitsulianik Saqqummersitsivimmit sinniisut suleqatigiillutik kalaallip, Anne-Birthe Hovep, eqqumiitsuliaanik 600-nit amerlanerusunik pisiortorput.

- Pissanganaqaaq, annertoqalunilu! Suliarpassuami Kalaallit Nunaannut utertinneqarnissai, naggataagullu Nunatta Eqqumiitsulianik Saqqummersitsivianiilernissai Anne-Birthe Hovep nammineq kissaatigisarsimavaa.

- Suliap piviusunngortissinnaanngorneranut Ny Carlsbergfondet aamma Anne-Birthe Hovep ilaqutai qutsavigaagut, Nuummi Eqqumiitsulianik Saqqummersitsivimmi pisortaq, Nivi Christensen, suliniummik ingerlataqarsimasoq tusagassiorfinnut nalunaaruteqarnermini oqarpoq.

- Inuuneq naallugu suliat

Nuummi Eqqumiitsulianik Saqqummersitsivimmit tusagassiorfinnut nalunaarummi ilisimatitsissutigineqarpoq eqqumiitsuliat nittartakkami annebirthehove.com-imi 2015-imi saqqummersinneqaqqaartut. Saqqummersinneqarsimasullu amerlanerpaartaat pisiortukkanut ilaapput.

- Suliat katillugit 600-t sinnerpaat. Amerlanerit naqitigaapput, atuakkat titartakkanik imallit, naqitigassaliat, qalipakkat, meqqutit kigartuutit il.il. Suleqatigiinnerup siammasinnera aamma Ny Carlsbergfondet-ip aningaasaliinera peqqutaallutik taamatut pisinissaq aatsaat anguneqarsinnaasimavoq, Nuummi Eqqumiitsulianik Saqqummersitsivik allappoq.

Kalaallit Nunaannut nassiunneqangajalersut

- Anne-Birthe Hove Kalaallit Nunaanni piffissani pingaarutilinni suliaqartarsimavoq. Kalaallit Nunaata amt-itut inneraninngaanniit, Namminersornerulerneq, 2009-milu Namminersulerneq pillugu isummersornera arlalitsigut malinnaavigineqarsinnaavoq, nalunaarutigineqarpoq.

Anne-Birthe Hove 2012-imi toquvoq.

Katersat Bornholmimiipput piffissamili qaninnermi nunatsinnukaanneqassallutik, agguaanneqassallutik katersugaasiviillu nalunaarsorfiannut ilanngunneqassallutik.