Danmark
Kalaallit efterskolimi atuartut amerlasuut taamaatiinnartarput
Naak kalaallit inuusuttut amerlasuut ukiut tamaasa danskit efterskolianni aallartittaraluartut, atuartut tallimaagaangata ataaseq taamaatittarpoq, kisitsisit nutaat tamanna takutippaat
Ukiut tamaasa aggustip aallartinnerani kalaallit inuusuttuaqqat ataatsimoorlutik Danmarkimut tikittarput.
Qilanaarlutik neriulluarlutik efterskolini nalinginnaasuni 10 klassimi atuariartortarput.
Kisianni kalaallit inuusuttut agguaqatigiisillugu 300-t aallartittartut akornanni, tallimaagaangata ataatsip atuarnini naammassineq ajorpaa, Naatsorsueqqissaartarfimmi kisitsisit nutaat tamanna takutippaat.
Taamaatitsinerit danskinit peqatiminnit marloriaammik amerlanerupput, danskit aviisiat Kristeligt Dagblad, tallimanngornermi taama allappoq.
Unammilligassat amerlanerusut
Efterskolini peqatigiiffiup ajornartorsiut eqqumaffigaa, politikkikkut perorsaanikkullu siunnersorti Maren Ottar Hessner naapertorlugu, kalaallit atuartut angerlarsertarnerat taakkununnga unammilligassaq annertunerunera pissutigalugu.
- Efterskolimi atuartunut tamanut angerlarserneq soorunami unammilligassaasinnaavoq. Kisianni kalaallit danskillu atuartut assigiinngissutigaat, danskit atuartut weekendini imaluunniit atuanngiffeqarnermi angerlarsinnaapput, kalaallillu pissutissaqarluarlutik taamaaliorsinnaanngillat, taanna Kristeligt Dagbladimut oqarpoq.
Kisianni Maren Ottar Hessner naapertorlugu angerlarserneq kisimi atuartuni inituneq ajortoq, allaanerusutut aamma misigisimaneq initusarpoq.
Ulluinnaat allaanerusut
Danskit efterskolianni kalaallinut inuusuttunut amerlasuunut aallartinneq annertuumik kulturikkut tupannermik misigititsisarpoq, inuusuttut siullermeerlutik ataatsimooriaaseq oqaloqatigeeriaaserlu najukkamit allaanerulluinnartoq misigisarpaat.
Efterskolimi qaammatit siulliit taamaatiffiunerusartut misilittakkat takutimmassuk, Efterskoleforening maanna atuartunut 'campertitsinermik' suliniuteqarput.
Efterskolemi atualertut Kalaallit Nunaanneersut tamarmik, atuarfinnut ataasiakkaanut siammartinnginnerminni aallarniutigalugu ataatsimoortinneqartassallutik.
Maren Ottar Hessner taamaammat neriuutigaa, iliuuseqarnerup kalaallit atuartut aallaqqaataaniilli pitsaanerusumik attaveqalernissaaat, taamaatiinnartarnerit taamaalillutik ikileriarniassammata.