Kalaallit-danskit piviusulersaarusiaat USA-mi filmfestivalimi ilisimaneqarluartumi takutinneqartussanngorpoq
Filmi piviusulersaarusiaq Twice Colonized tusaamaneqarluartumi Sundance Film Festivalimi ukioq nutaaq aallartippat takuteqqaarneqassaaq.
Twice Coloniced, Sundance Film Festival januaarip 19-ianiit 29-anut ingerlanneqarpat takuteqqaarneqqaarneqassaaq
Tamanna aalajangiunneqaqqammertoq, Neumann Strategi & Kommunikationimit Ánorâk Film sinnerlugu tusagassiorfitsigut nalunaaruteqarnermi ilisimatitsissutigineqarpoq. Twice Coloniced nunani tamalaani piviusulersaarutitut filmilianut ilaavoq - taamaammallu filminut piviusulersaarutinut allanut unammisinneqassalluni.
Kalaallit-danskit piviusulersaarusiaat ukiuni arfineq-marlunni suliarineqarsimasoq, kalaaleq Aaju Peter Issittumi tamarmi inuit pisinnaatitaaffiinik sorsuuteqartartoq pillugu oqaluttuartuuvoq. Aajup qaniginerpaasaani alianartumik pisoqarmat, Aaju inuunermini pisimasut kiinarsiniarlugit aamma nunat inoqqaavisa oqartussaaqataanerat kiffaanngissuseqarnerallu qulakkeerniarlugu aallarpoq.
Piffissamili aalajangersimasumi silarsuaq allanngortinneqarsinnaallunilu nammineq ikit katsorsarneqarsinnaappat?
Illartarlutillu qullilisartut
Filmimi Aaju Peterp Kalaallit Nunaanni, Danmarkimi maannalu nunagisamini Candami suliaqarnera malinnaaffigineqarpoq, nunarsuarmi nunat inoqqaavisa pisinnaatitaaffiinik sorsuuteqarluni suliaqarnera malinnaaffigineqarluni, Neumann Strategi & Kommunikationimit ilisimatitsissutigineqarpoq.
- Filmi ukiuni arfineq-marlunni suliarineqarsimavoq. Suliarineqarnera uannut Aajumullu illarnartarlunilu qulliliffiusarsimavoq, taamaammat Sundancemit akuersaarneqarnera nuannaarutigisupilussuuara, filmimi ilitsersuisoq Lin Alluna oqarpoq.
Nangillunilu:
- Aaju inuuvoq pimoorussisoq, ilinniarfiginiassagatsigu inuunermi oqaluttuassartaanik tusartitsisartoq, taamalu kinaanerminik takutitsilluni. Neriuutinga tassaavoq, Aajup uagutsinnut tamanut isumassarsisitsisarneratulli filmi nunarsuarmioqatitsinnut isumassarsisitsiumaartoq.
2023-mi Danmarkimi takuteqqaarneqassasoq
Lin Alluna filmimik tassannga Aaju Peter suleqatigilluinnarlugu filmiliarineqarsimasumik ilitsersuisutut takutitseqqaaqataassasoq, ilanngullugu ilisimatitsissutigineqarpoq.
Filmi kalaallit-danskit ingerlatseqatigiiffiutaanni Ánorâk Filmimeersup Emile Hertling Péronardip suliaraa, tassani canadamiut ingerlatseqatigiiffiutaanni Red Marrow Media-meersut Alethea Arnaquq-Baril aamma Stacey Aglo kiisalu Canadami EyeSteelFilmimeersoq Bob Moore suleqatigalugit.
Filmimut aamma aningaasaliissuteqarsimapput Det Danske Filminstitut, Namminersorlutik Oqartussat, DR, KNR TV, CBC, Canada Media Fund, Nunavut Film Development Corporation, Eurimages allallu.
Filmen forventes at få dansk premiere i 2023.