Skip to main content

Kalaallit Danmarkimiittut akiuussutissalertinnissamut neqeroorfigineqassapput

Kalaallit nunatsinni najugallit piffissami sivikinnerusumi sivisunerusumiluunniit Danmarkimiikkallartut akiuussutissalertissinnaatitaanermut ilaatinneqanngillat – tamanna aamma coronamut akiuussutissalertinnissamut atuuppoq. Inatsilli nutaaq aqqutigalugu tamanna allanngortinneqassaaq.

Folketingimi ilaasortap Aaja Chemnitz Larsenip (IA) kaammattuineratigut Folketingimi Kalaallit Nunaannut tunngatillugu Ataatsimiititaliaq peqqissutsimut ministerimut apeqquteqarsimavoq, napparsimallutik uninngasut coronamut akiuussutissalertissinnaasut akornanni kikkut salliutinneqarnersut.

Ataatsimiititaliami immikkut paaserusunneqarsimavoq, Danmarkip naalagaaffiani innuttaasut suliaritinniarlutik uninngasut akeqanngitsumik akiuussutissalertissinnaanersut tassa uninngasut Kalaallit Nunaanneersuunersut Savalimmiuneersuunersullu apeqqutaatinnagit.

Peqqissutsimut ministerip Magnus Heunickep akissutaani allassimavoq, inuit Savalimmiuneersullutillu Kalaallit Nunaanneersut atuarnerminnut ilinniagaqarnerminulluunniit atatillugu Danmarkimiittut, Danmarkimi innuttaasut allat assigalugit napparsimmavimmi suliaritinnissamut aamma akiuussutissalertinnissamut pisinnaatitaaffeqartut.

Katsorsaaneq akiuussutissaliinissamik neqerooruteqarnissamut aporfiusartoq

Pisinnaatitaaffilli pineqartoq kalaallinut savalimmiormiunullu Danmarkimiikkallartunut, assersuutigalugu piffissami sivikinnerusumi sivisunerusumiluunniit peqqinnissaqarfimmi katsorsartittunut atuutinngilaq. Allannguutissatulli siunnersuutip Folketingimi saqqummiunneqaqqamersup tamanna allanngortissavaa.

Inatsimmut allannguutissatut pilersaarutaasoq malillugu, Covid-19-imut akiuussutissaliinissaq inuit Danmarkimi najugaqartut assigalugit inunnut Danmarkimi najugaqanngitsunut neqeroorutigineqassaaq. Tassa akiuussutissalertinnissamut neqeroorut tigussanerlugu nammineq aalajangerneqarsinnaavoq aamma akeqanngilaq.

Allannguutissatut siunnersuummi takuneqarsinnaavoq, inuit pineqartut tassaasut aallartitat aalajangersimasut, inuit Savalimmiuneersuullutillu Kalaallit Nunaanneersut, angerlarsimaffeqanngitsut inuillu Danmarkimi najugaqarnissamut akuersissuteqaratik Danmarkimiittut, taakkununnga ilanngullugit nunanit allamiut il.il. inuit allattorsimaffiannut nalunaarsorneqarsimanatik allat inatsisaat malillugit akiussutissalerneqarsinnaanngitsut .

Naatsorsuutigineqarpoq, siunnersuut 2021-mi martsip aallaqqaataani atuutsinneqalissasoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER