Kalaallit Danmarkimi najugaqartut amerlanerusunik aningaasaliiffigineqarnissaat isumaqatigiissutigineqartoq
Folketingi kalaallinut Danmarkimi atugarliortunut ukiullu sisamat tulliuttut ingerlaneranni atornerluisut katsorsarneqartarnerannut pitsanngorsaanissamut 28,4 millioner koruuninik immikkoortitsisimavoq.
Folketingimi partiit kalaallinut Danmarkimi najugaqarlutik atugarliortunut amerlanerusunik aningaasaliissuteqarnissamik isumaqatigiissuteqarput.
Folketingimi ilaasortap Aaja Chemnitz Larsenip isumaqatigiissut pillugu ministeri nersualaarpaa.
- Kalaallinut atugarliortunut ikiorsiissuteqartarnissaq Folketingimi partiinit tamanit pingaarnerutinneqartanngilaq, taamaammat Isumaginninnermut Nunamullu Namminermut ministerit Astrid Krag suliassamik tamatumannga pingaartitsineranik nersualaaginnarsinnaavara.
Isumaginninnermut Nunamullu Namminermut ministeri isumaqarpoq, kalaallit Danmarkimi innuttaasut 1.500-t mssaanniittut atugarliortuusut, taakkunanngalu 400-t sinnerlugit angerlarsimaffeqanngitsuusut. Partiit isumaqatigiissuteqartuusut isumaqatigiissutigaat, kalaallit Danmarkimi innuttaasuullutik atugarliortuusut pillugit suleqatigiinneq pitsanngorsaaffigineqassasoq, taamaammat kalaallinut atugarliortunut atornerluisuunermillu katsorsaasarnerup pitsanngorsaaffigineqarnissaanut 2021-miit 2024-mut 28,4 millioner koruunit immikkoortinneqarsimapput.
Ikiorserneqarnissamik pisariaqartitsisut amerliartortut
Aaja Chemnitz Larsenip erseqqissaatigaa, isumaqatiginninniarnerit sakkortusimasut, taamaammallu inaarutaasumik angusarineqartut nuannaarutigai.
- Kalaallit Danmarkimi najugaqartut amerlanerpaartaat ajunngivisummik ingerlapput, ikinnerussuteqartulli immikkut ittumik iliuuseqarfigineqarnissartik pisariaqartippaat. Pisariaqartitsisut ajoraluartumik ukiuni makkunani amerliartorput. Nunaqqaterpassuavut Danmarkimi aallartinnerliortartut annaasarpavut, kalaallinullu atugarliortunut aningaasarpassuarnik immikkoortitsinerup takutippaam annertuumik iliuuseqartoqartariaqartoq, taanna oqarpoq.
Kalaallt Nunaata isumaqatiginninniarnermut toqqaannartumik peqataatinneqarnera aatsaat ukiut aappassaat pivoq, angusarineqartunullu isumaqatigiissutigineqartut tigussaasut ilaannut tamatuma naapertuunnera pingaaruteqarluarpoq, politikkeri erseqqissaavoq.
- Uagutsinnut pingaaruteqarsimavoq, Danmarkimi kalaallit illuini kalaallillu peqatigiiffiini kattuffiinilu 30-t missaanniittuni piginnaasaqarfiit ilisimasallu pitsaanerusumik atorneqartarnissaat, taanna oqaluttuarpoq.
Imminut ikiorsernissamut ikiorsiisoqarnerusarnissaa
Isumaqatigiissummi aamma oqaasertaliunneqarsimavoq, aningaasat immikkoortinneqarsimasut ilaat tarnip pissusaanik ilisimasalimmit katsorsarneqarnissamut nutserisoqartarnissamullu atorneqartassasut, Aaja Chemnitz Larsen ilisimatitsivoq.
Suliniuteqarniarnermili pingaarneruvoq, innuttaasut ikiorserneqarnissamik pisariaqartitsilinnginneranni iliuuseqarfigineqartarnissaat, taanna isumaqarpoq.
- Siunissami isumaginninnermi politikkeqarnissami qulakkeerneqartariaqarpoq, isumaginninnikkut neqeroorutissarpassuarnik suliaqarnissamut sanilliullugu imminut ikiorsernissamut ikiorsiisoqarnerusarnissaa.