Skip to main content

Kalaallit Danmarkimi inuuniarnermikkut ajornartorsioqqajaasut nakuuserneq, atornerluineq aamma angerlarsimaffeqannginneq atugaraat

Kalaallit Danmarkimi najugaqartut inuuniarnermikkut ajornartorsioqqajaasut nakuusernermik, imigassamik atornerluinermik aamma angerlarsimaffeqannginnermik atugaqartut, nalunaarusiap nutaap takutippaa.

Kalaallit Danmarkimi najugaqartut inuuniarnermikkut ajornartorsioqqajaasut pingajorarterutaat nakuuserfigineqarsimapput.

Statens Institut for Folkesundhedip Rådet for Socialt Udsattemut nalunaarusiaata nutaap tamanna takutippaa.

Kalaallit inuuniarnermikkut ajornartorsioqqajaasut 31 procentii nakuuserfigineqarsimasut, soorlu tukertillutik, patitsillutik aamma aalatinneqarlutik, inuuniarnermikkut ajornartorsioqqajaasut sinnerini 16 procentiisa misigisimasarpaat.

- Kalaallit inuuniarnermikkut ajornartorsioqqajaasut taama nakuuserneqarfigineqartigisarneri ilungersunartorujussuuvoq, siunnersuisoqatigiinni siulittaasoq, Jann Sjursen, tusagassiuutinut nalunaarummi taama oqarpoq.

Kalaallit Danmarkimiittut inuuniarnermikkut ajornartorsioqqajaasut pillugit aatsaat siullermeerluni immikkut misissuiffigineqarput.

Kalaallit Danmarkimiittut inuuniarnermikkut ajornartorsioqqajaasut 1000-1500-t missaanniittut naatsorsuutigineqarpoq. Illoqarfinni annerni najugaqarlutik.

Inuuniarnermikkut ajornartorsioqqajaasut ilaatigut suliffeqannginnermikkut, angerlarsimaffeqannginnermikkut aamma tarnimikkut nappaateqarnermikkut ilisarnaaserneqartarput.

Kalaallit inuuniarnermikkut ajornartorsioqqajaasut 40 procentii imigassamik atornerluisuusut, misissuinerup takutippaa.

Inuuniarnermikkut ajornartorsioqqajaasut sinnerini kisitsit 13 procentimiippoq.

Kalaallit inuuniarnermikkut ajornartorsioqqajaasut affaat angerlarsimaffeqanngillat, inuuniarnermikkut ajornartorsioqqajaasut sinnerini 24 procentiullutik.

- Danmarkimi innutaasut inuuniarnermikkut ajornartorsioqqajaasuni kalaallit amerlasut ilisimaarilluarneqarpoq.

- Misissuinermik matuminnga siullermeerluta, ataatsimut isigalugu peqqissusaat atugaallu pillugit uppernarsaateqalerpugut, aamma ajornartorsiutit sorpiaat inuuniarnermikkut ajornartorsioqqajaasut sinnerinut atugaat sanilliullugit, Jann Sjursen oqarpoq.

Nalunaarusiami inerniliunneqartut pingasunngornermi ataatsimeersuarnermi saqqummiunneqassapput, tassanilu kattuffiit assigiinngitsut ikiuniarnerup qanoq pitsanngorsinnaanera oqaluuserissavaat.

- Eqimattat sorpassuartigut inuuniarnermikkut ajornartorsioqqajaasunit allanit allaanerunerat, misissuinerup ataatsimut isigalugu takutippaa.

- Taamaattumik neqeroorutinik allanik aamma periuseqarfigineqassanersut isumaliutersuuteqarfigineqarnissaat tunngavissaqarluarunarpoq, Jann Sjursen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER