Atuakkat

Kalaallit Atuakkiortut peqatigiiffiani siulersuisut ukiuni sisamani ingerlaqipput

Kalaallit Atuakkiortut peqatigiiffianni siulersuisut tamarmik unammillerteqaratik qinigaaqqipput. Juaaka Lyberth siulittaasutut ingerlaqqippoq.

Juaaka Lyberth fortsætter som formand for Kalaallit Atuakkiortut

Nunatsinni atuakkiortut peqatigiiffiani, Kalaallit Atuakkiortut, siulersuisui tamakkerlutik 2017-miit 2021-mut atuuttumik siulersuisuni ingerlaannartussatut qinigaaqqipput.

Kalaallit Atuakkiortut ileqquusumik sapaammi ulloq 12. november ileqquusumik ataatsimeersuarnerani, piffissami 2014-miit 2017-mut siulersuusimasut tamarmik qinigaaqqipput. Qinigaaqqinneq ataatsimeersuarnermi ilaasortat peqataaffigisaanni, unammillerteqaratik qinigaaqqinnerat pissutigalugu ersaattaanneqarput.

Siulersuisuni ilaasortat tamakkerlutik qinigassanngorteqqissinnaanertik nalunaarutigereersimammassuk, siulersuisut ingerlaannarnissaat periarfissaalersimavoq.

- 2014-imi ileqquusumik ataatsimeersuarnermi suliakkiunneqarsimasut nuannaarutigeqaavut. Siulersuisuni suleqatigiilluarpugut – suliakkiunneqarsimasulli tamakkerlugit suli angusimanngilagut, Juaaka Lyberth siulittaasuusimasoq siulittaasutulli ingerlaqqittoq oqarpoq.

- Taammaammat suliakkiunneqarsimasut naammasserusullugit siulersuisut tamakkerlutik ingerlaqqinnissartik kissaatigaat – ataatsimeersuarnerup ingerlanerani unammillerteqalinngikkutta. Ingerlaqqikkusunnitsinnut tamanna tunngavigaarput.

Juaaka Lyberth siulittaasutut qinigaaqqippoq. Siulersuisunilu ilaasortat sinneri tassaapput: Kirstine K. Olsen (siulittaasup tullia) Sørine Steenholdt (aningaaserisoq), Tupaarnaq Rosing Olsen (allatsi) siulersuisunilu ilaasortat Juâna Petrussen. Sinniisussaq siulleq Markus E Olsen aamma qinigaaqqittoq, sinniisussallu aappaa nutaatut qinigaavoq atuakkiortoq inuusuttoq qanittumi siullermeerluni atuakkamik saqqummersitseqqammertoq Nukaaka Berthelsen.

Kallaallit Atuakkiortut ukiut pingasukkaarlugit ileqquusumik ataatsimeersuartarpoq. Ataatsimeersuannginnermilu KA ornigarneqarluartumik atuakkat pillugit tallimanngormat ulloq 10. november aaqqissuussivoq, arfininngormallu "misilittakkanik aviteqatigiinneq, atuakkiortut piffissami misissuitillutik allallutillu milisilittagaannik avitseqatigiinneq" qulequtaralugu, ilaasortanut soqutiginnittunullu iluatsilluartumik paasititsiniaavoq.

Powered by Labrador CMS