Kalaallit arnat atugarliortut amerliartuinnartut Reden-imukartalersut
Kalaallit arnartaat ikittuinnaat ukiut qulit matuma siornatigut Odensemiittumi Reden-imuartarsimappput, ullumikkulli 10-20-t piffissami sivikinnerusumi sivisunerusumiluunniit eqqissisimaarfigiartortalersimavaat.
Reden Odensemiittoq er en del af KFUK-p isumaginninnermi suliaqarfiisa ilagtaat. Taanna namminersortutut suliniaqatigiiffiuvoq, Københavnimi, Aarhusimi, Ålborgimi Esbjergimilu aamma eqqissisimaartarfeqarpoq.
Reden Odensemiittoq 1990-imili arnat 18-ileereersimasut atornerluinermik, akilersilluni atoqatigineqartarnermik, tarnikkut ilungersuuteqarnermik angerlarsimaffeqannginnermillu atugaqarlutik inuusut ornittagarisimavaat. Arnanut nunanit allaneersunut tunngatillugu inunnik niueruteqarsimaneq tamatumani pineqarsinnaasoq. Reden kinaassutsimik isertuilluni ornittagaavoq.
Sunnertiasut
Odensemiittumi Reden-imi forstanderip Mette Guul-ip erseqqissaassutigaa, arnat Reden-imukartartut sunnertiasuusut inuppassuarnillu taaneqartartutut atugarliortuunngitsut.
- Atuisorisartakkatta 25%-iisa missaanniittut arnaapput kalaallit. Kalaallit arnat 50-it missaanniittut nalunngilagut, taakkunannga 10-20-t akulikitsumik ornittarpaatigut, Mette Guul oqaluttuarpoq, nangillunilu:
- Arnat oqaluttuarisartagaat tataannartupilussuit amerlasuut tusartarpavut. Arnat ajorluinnartunik misigisaqartarsimapput. Innarlerneqarnermiit innarlerneqarnermut. Aassigiinngitsutigut atornerluinerit. Arlallit aamma kamassaqartaqaat, sunalu tamarmi ajorluinnaraangat kamattaqalutik.
Ilaannut qanga pisimasut sakkortoorujuusimasut
Reden-imi sulisut sakkortoorujunnik tusartarnertik sungiussimagaluarlugu, arnat kalaallit taamak amerlatigisut ikiorserneqarnissamik pisariaqartitsinerat tupaallaatigisimavaat. Arnat Kalaallit Nunaanneersut toqqaannartumik ornittarpaatigut.
- Soorunami aamma Odensep sunilluunniit pisoqarsinnaalluni illoqarferujussuunera tassunga attuumassuteqarsinnaavoq.
Amerlasuutigut sila taarsigaangat arnat assigiinngitsutigut sunnertiasut toqqissillutik isersimaffigisinnaasaminnik piariaqartitsilersarput.
Killilersuisoqanngitsoq
Qanorluunniit ikkaluaraanni Reden-imut isertoqarsinnaajuaannarpoq. Ajorluinnaraluaraanniluunnii, immaqalu aalakuualaalluni ikiaroorluniluunniit takkukkaanni matu matoqqaneq ajorpoq. Ulloq unnuarlu naangajallugu ammasarpoq. Taamaallaat nalunaaqutaq 08.00-11.30 matoqqasarpoq. Reden-imit neqeroorutigineqartartut assigiinngitsut akeqanngillat, kinaassutsimillu isertuilluni atorneqarsinnaallutik: Nerisassat, siunnersuineq ilitsersuinerlu, tapersersorneqarneq isumassorneqarnerlu kiisalu unnuineq.
Reden-imi unnuinissamut pisariaqartitsilivinneruinnaasariaqanngilaq – aamma assersuutigalugu annilaanganeq eqqissiveqannginnerluunniit pissutigalugit nammineq inigisamiissinnaanngikkaanni unnuiartortoqarsinnaavoq. Tamanna taaneqartarpoq "angerlarsimaffeqanngikkallarneq" (funktionel hjemløshed), tassa nammineq ineqaraluarluni assigiinngitsut pissutigalugit inigisamiissinnaannginneq. Reden Odensemiittoq arfineq-malunnut inissalimmik sinittarfeqarpoq, taakkulu naammanngikkaagata sofa issiavissuilluunniit marluk atorneqarsinnaasarput.
Reden-imit sulissutigineqartarput arnat inuunermi atukkaminnit ajoqusersinnaanerannik kingunerluuteqarsinnaanerannillu pinaveersaartitsineq, annikillisaaneq ikiorsiinerlu.
Kalaallinut atuisunut iliuuseqarnerorusuttut
Reden-imi aqutsisut atuisuminnut kalaallinut iliuuseqarnerorusupput, minnerunngitsumik atuisut amerliartuinnarmata. Taamatut ineriartortoqarnera ajoraluartumik allanngortinneqarsinnaanngitsutut isikkoqarpoq.
- Assersuutigalugu kalaaliminernik akulikinnerusumik nerisaqartitsisarnikkut kalaalerpalunnerusunngortitsisoqarsinnaavoq, forstaneri Mette Guul oqarpoq.
Allarpassuit assigalugit Coronap ukiuni marlunni atuunnerani pilersaarutigineqarsimasut taakku unitsikkallarneqarsimapput.
Reden ulloq unnuarlu ammasarami soorunami sulisorpassuarnik pisariaqartitsivoq. Suut tamarmik ajunngitsumik ingerlassappata sulisut assigiinngitsut 18-it, pilersaarusiortartut pingasut, namminneq kajumissutsiminnik sulisut 10-12-it kiisalu taartaasartut aalajangersimasut pisariaqartinneqarput.
Reden Odensemiittoq Odense Kommunimik aamma Socialstyrelsenimik ingerlatsinissamut isumaqatigiissuteqarpoq. Ingerlatsineq kisiat pinnagu, allalli aningaasaateqarfinnit inuinnaallu tunissutaannit aningaasalersorneqartarput.
Odensemi adressemi allami Redernes Krisecenter Fyn atuuppoq, taanna inunnut persuttarneqarsimanertik pissutigalugu illersorneqarnissamik isumannaatsuunissamillu pisariaqartitsisunut atugassiaavoq.