Kalaallit aqumiut amerlisarnissaani suliniuteqarneq aqqutigineqassaaq

Inuussutissarsiornikkut aammalu inuiaqatigiinni aalisarnerni aammalu niuffagiutini aqumiut nunatsinneersut annertusiartortumik amigaatigineqarneri ajornartorsiutaavoq. Soqutigisaqaqatigiit ataatsimoorussillutik iliuuseqalerneranik tamanna kinguneqarpoq.

Aqumiut kalaallit umiarsuaatileqatigiiffianiittut utoqqaliartorput, uppernarsineqarporlu inuusuttunik Kalaallit Nunaaneersunik aqumiussanik sulilerumaartussanik kingoraartissarsinissaq ajornakusoortoq. Ilaatigut tamanna kinguneqarpoq aalisarnikkut inuussutissarsiornermi ingerlatsiviusuni nalunaarusiap aalisariutit inuttalerneqarneri pillugit malittarisassat najoqqutarineqarniarneri eqquutsikkuminaallisut.

Taamaammallu maanna suligasuartussamik eqimattamik suleqatigiissitaliortoqarpoq, inuttaralugit Jeppe Carstensen Imarsiornermik Ilinniarfik/ Grønlands Maritime Center-imeersoq, Jens Kleist Polar Seafood-imeersoq, Kristen Laursen Royal Greenland-imeersoq, Line Mika Skov aammalu Line Poulsen Royal Arctic Line-imeersut, Mikkili Skourup Sermilik-imeersoq aammalu Karsten Lyberth-Klausen kiisalu Bent Sørensen Kalaallit Nunaani Sulisitsisut Peqatigiiffiat/ GA-meersut.

Pitsaanerusariaqartoq
- Ataatsimut isigalugu suliffeqarfittut ingerlatsivittut ersarissumik kissaataavoq umiarsuaatigut sapinngisaq tamaat atorlugu Kalaallit Nunaaneersunik sulisinnaasunik inuttalersornissaat, Karsten Lyberth-Klausen allattoqarfimmi pisortaq GA-meersoq oqarpoq.

- Taamaammat kissaatigaarput inuusuttut pikkorissut imarsiornermi ilinniarnissaat angutserlugu iliuuseqassalluta, tamatumani aalisarnikkut kiisalu niueruteqarnikkut angallatinik aqumiussatut ilinnialernissaat angorusullugu. Annerusumik pineqarput aqumiut, aquttut, maskinmester-it kiisalu fiskeriteknolog-it, Karsten Lyberth-Klausen oqaluttuarpoq.

Amigaatigineqartut 59-it
- Ilumoorsinnaanngilaq Kalaallit Nunaani - imarsiornermik ingerlatsinermi ileqqorilluagaqartugut – aqumiut amerlanersaat nunap avataaniit tikisittariaqassagigut, taamaammallu ajornartorsiut aaqqiissuteqarfigalugu suliarisariaqarparput, Karsten Lyberth- Klausen nangilluni oqarpoq.

– Piffissaq sivikinnerusoq isigalugu ullumikkut imarsiornermik ilinniarfissat 59-it neqeroorutigisinnaapput, maannarpiarlu unammillernartut takusinnaasat, tamatumani ullumikkut sulisinnaasunik amigaateqarneq iliuuseqarfiginissaat suliniuteqarfigissavarput. Aammattaarli salliullugu piffissaq sivisunerusoq isigalugu iliuusissatut pilersaarusiamik suliaqassaagut, ukiunilu tulliuttuni 5-ini 10-llu akornani ingerlanerini minnerunngitsumik qulakkiissavarput aalisarnermik inuussutissarsiornermi naammattunik aqumioqartoqarnissaa. Takusinnaavarpummi ukiuni tulliuttuni ajornartorsiut alligaluttuinnassasoq, aqumiunillu nutaanik naammassilluni ilinniartoqarnissaq piffissamik atuiffiusariaqartarpoq, imarsiornermik ilinniarfikkut ilinniartoqarfinni ingerlaavaqqaartussaasarmata.