Legatit

Kalaallit angusaqarluarusuttut arfineq-marluk legatinnapput

Arnat tallimat angutillu marluk Ivalo aamma Minik Fondenimit tapiiffigineqarput

Minik Rosing Ivalo & Minik Fondenip siulersuisuini siulittaasuuvoq

Ivalo aamma Minik Fondenip siulersuisuisa legatinik millionip affaanik amerlatigisunik agguaassissallutik aalajangiussimavaat.

Tamannalu aningaasaateqarfiup siulittaasuat, Minik Rosingip nuannaarutigaa.

- Neriuppunga legatiutigut ilinniartut piginnaaneqanerulernissaannut aamma misilittagaqarnerulernissaanut taakkununnga Kalaallit Nunaannullu iluaqutaasumik aqqutaajumaartut. Neriuppunga legatinik pissarsisut tamarmik nunani allaniinnertik iluaqutissarsivigiumaaraat kingornalu Kalaallit Nunaannut uteriarunik ilisimalikkatit Kalaallit Nunaanni atorumaaraat, Nunafonden, Royal Greenland, Royal Arctic Line aamma Grønlandsbankens Erhvervsfondia tapiinissamut piviusunngortitsisut qujaffigalugit taanna oqarpoq.

Legatinnattut:

  • Andrea Christiansen, Ilisimatusarfimmi tusagassiortunngorniarnerminut atatillugu semesteri ataaseq Canadami Vancouver Island Universitymi ingerlanniassammagu legatinnappoq.
  • Angùnguak Thomas Kleist Jepsen Københavnip universitetiani ujarassiuumut ilinniarnerminut atatillugu Australiami Curtin Universitymi semestret pingasut ingerlanniassammagit legatinnappoq.
  • Birthe Rasmussen Ilisimatusarfimmi peqqissaasumut ilinniarpoq. Legatimik pissarsivoq Mellemfolkeligt Samvirke aqqutigalugu Tanzaniami peqqissaasutut ilinniarnerminut atatillugu sungiusaatigalugu suliniassammat.

  • Hans Peder Kirkegaard Nunarsuarmioqatigiit niueqatigiinnerat pillugu Masterimut USA-mi University of South Carolinami Darla Moore School of Businessimi ilinniarniassammat legatinnappoq.

  • Mikaela Augustussenpeqqissaasutut naammassinikuuvoq aallartinnikuullugulu Ph.D-mut ilinniarnini Ilisimatuarfimmi qulequtaqartoq "Kalaallit Nunaanni Danmarkimilu kalaallinut nappaassuarmik kræftimik napparsimangaatsialereersunut nipaallisaalluni katsorsaaneq". Tassunga atatillugu Tromsømi Norgep Arktiske Universitetiani atuarnissaminut legatimik pissarsivoq.

  • Mona Koch Madsen Ilisimatusarfimmi peqqissaasumut ilinniarnikuuvoq. Sverige Stockholmimi Karolinska Institutimi intensivsygeplejerskimut ilinniaqqinnissaminut legatimik pissarsivoq.

  • Uiloq Mathæussen Ilisimartusarfimmi Oqaatsinut, Atuakkialerinermut aamma tusagassiutinut bacheloriuvoq. Ilinniaqqinnerminut atatillugu Frankrigimi Université De Versailles St. Quentin En Yvelinesimi semesteri ataaseq atuassavaa tassunga atatillugu legatimik pissarsivoq.

Ivalo aamma Minik Fonden legatinik tunniussuinini nangeqqissavaa. Tullianut qinnuteqarnissamut ulloq 15. februar 2016 killeritinneqarpoq.

Powered by Labrador CMS