Kalaallit Airports: Sulisut angerlartinneqarput
Kalaallit Airportsimi sulisoq ataaseq Covid-19-imik tunillatsissimavoq. Pineqartoq mattusimatinneqarpoq, sulisullu allat tamarmik angerlartinneqarlutik, suliffeqarfik ilisimatitsivoq.
- Sulisut tamaasa angerlartippavut, Covid-19-imillu tunillatsittoqarsinnaanera killilersimaarniarlugu qanoq iliuuseqassanerluta oqartussanik oqaloqateqarluta, Kalaallit Airportsimi pisortaaneq Jens Lauridsen tusagassiorfinnut nalunaaruteqarluni oqarpoq.
KAIR-imi sulisut allat tunillatsissimanngillat. Sulisut ikittuinnaat tunillatsissimasumut attaveqarsimapput. Suliffeqarfimmit tunillatsittoqarsimaneranik erseqqissumik paasisaqarnissatta tungaanut sulisut tamarmik mattusimasussanngorlugit angerlartinneqarsimapput.
- Sulisoq ataaseq tunillatsissimanersoq suli paasinatiguli, tunillatsissimasinnaanera saqqummiunneqarmat ingerlaannaq qisuariarpugut. Ajoraluartumillu tunillatsissimasoq paasinarsilluni, Jens Lauridsen ilanngussilluni oqarpoq.
Sulisoq ajunngitsoq
Pisortaanerup sulisoq pineqartoq ullumi arlaleriarluni attaveqarfigisarsimavaa, oqaatigalugulu sulisoq ajunngitsoq.
Jens Lauridsenip Sermitsiaq:AG-mut ilisimatitsissutigaam sulisup sumi tunillatsissimanera ilisimanagu.
Pisortaanerup erseqqissaatigaa, tunillatsissimasoq pisortatigoortumik malittarisassanik innersuussutigineqartunillu unioqqutitsilluni iliuuseqarsimanersoq pillugu paasissutissaateqarnani.
- Aqutsisut sulisullu tuniluuttoqarnera tamakkerlugu oqartussat malittarisassaannik innersuussutaannillu malinninnissaq pingaartilluinnarsimavaat, Jens R. Lauridsen naggasiivoq.