Kalaallit Airports: Suliaqartartut arfinillit mittarfiliortitsinissamut neqeroortinneqassapput
Suliffeqarfissuit arfinillit nunanit tamalaaneersut Ilulissani, Nuummi Qaqortumilu mittarfiliortussatut toqqarneqarput
Kalaallit Airports A/S-ip piukkunnartussarsiuussinermi sanaartugassanik suliarinnittartut
nunani tamalaani misilittagaqartut arfinillit mittarfissani sanaartornermik suliassanut neqerooruteqartussatut aqqanillit toqqarpai. Taakku Hollandiminngaanneersuupput, Canadaminngaanneersuupput, Kinaminngaanneersuupput arlallillu Danmarkiminngaanneerlutillu Islandiminngaanneersuupput
Uku suliarissavaat
Suliassat pingaartumik mittarfissanik, mittarfiup iluani aqqusinernik aamma silataanni nunaminertanik, timmisartoqarfiit
ungaluisa iluani teknikkikkut ikkussuinertaqartunik, sanaartornermut tunngassuteqassapput. Silataanni suliassat mittarfeqarfiup sumiiffianut aqqusinniassanut, biilinut unittarfinnut,
pilersuinermi aqqusersuutit allanngortiterneqarnerinut aamma mittarfiit illutassaannut nunaminertanik piareersaanermut tunngassuteqassapput, kisianni illutaannik, aatsaat
kingusinnerusukkut neqeroortitsivigineqartussanik, sanaartornermut tunngassuteqassanatik, Kalaallit Airport tusagassiuutinut nalunaarummi allappoq.
Piukkunnartussarsiuussinissamut neqerooruteqaqqusineq Europami nunanut arlalinnut, Asiamut aamma Amerikami avannarlermut nassiussuunneqarsimavoq.
Arfinillit piukkunneqartut
Kalaallit Airports A/S-ip peqqissaartumik nalilersuilluni suliarinnereernerata kingorna ataatsimoortukkaat arfinillit makkua piukkunneqassasut aalajangiisoqarpoq:
- Aarsleff - Ístak Joint Venture (Danmark/Island)
- BAM International bv. (Holland)
- China Communications Construction Company Ltd. (Kina)
- Munck Gruppen A/S (Danmark)
- MT Højgaard A/S (Danmark)
- Pennecon Dexter Joint Venture (Canada)
Sanaartugassanik suliarinnittartunik toqqaanermi, neqerooruteqartut aningaasaqarnikkut pisinnaasaqassusaat taamatullu teknikkikkut suliatigullu pikkorissuseqarnerat pisinnaasaqarnerallu,
pingaartinneqarput. Ilanngullugu aamma sanaartugassanik suliarinnittartut Kalaallit Nunaanni pissutsinut naapertuuttuni sanaartugassanik suliaqarnermik misilittagaqarnerat, pingaartinneqarpoq.
Tikeraarneq
Sanaartugassanik suliaqartartut ataatsimoortukkaat piukkunneqartut taakkua qaammatit tulliuttut ingerlaneranni, sumiiffiit suliaqarfiusussat aammalu najukkani pissutsit namminneq tikillugit paasisaqarfiginiarlugit, Ilulissat aamma Nuuk tikeraassavaat.
- Sanaartugassanik suliarinnittartut suliffeqarfiit nunani tamalaani iluarineqartut akornanni, piukkunneqarnissaq pillugu qinnuteqarnissamut soqutiginninnerup annertuujunera, Kalaallit
Airports A/S-ip naammagisimaartorujussuuaa. Pikkorissuunerat unammillersinnaassuseqarnerallu nuannaarutigaarput, aammalu Ilulissani, Nuummi aamma Qaqortumi mittarfissat nutaat taakkua
piviusunngortinneqarnissaannut alloriaqqinnissamut tullermut qilanaarpugut, pisortaaneq Steffen Ulrich-Lynge, oqarpoq.
Anguniagassatut pilersaarusiaq
Ilulissani aamma Nuummi sanaartugassanik suliaqarnissat, Nuummi 2018-imi septembarimi/oktobarimi aammalu Ilulissani 2019-imi apriilimi sanaartorneq aallartittussatut, 2018-imi aasalernerani ataatsikkut neqeroortitsivigineqassasut naatsorsuutigineqarpoq. Qaqortumi sanaartornermik suliaqarnerit 2020-imi sanaartorneq aallartittussatut, 2019-imi neqeroortitsivigineqassasoq naatsorsuutigineqarpoq.
Mittarfissat pingasut taakkua tamarmik 2022-imi ukiaanerani atorneqalernissaat pilersaarutigineqarpoq.