Skip to main content

Kalaallit Airports: Siulersuisut nutaat angutaannarnik inuttaqartut

Siulersuisuni suiaassutsikkut naligiinnerusoqarnissaanik inatsiseqaraluartoq, Namminersorlutik Oqartussat Kalaallit Airportsimi siulersuisut nutaat angutaannaasut akuerisimavaat.

Kalaallit Airports Holding A/S-imi ileqquusumik ataatsimeersuartoqarmat, siulersuisunngortut nutaat Namminersorlutik Oqartussanit oqaasertaqanngitsumik akuerineqarsimapput.

Taamatut pisoqarsimavoq, inatsimmi atuuttumi piumasaqaataagaluartoq siulersuisuni arnat angutillu naligiissinneqassasut.

Siulersuisuni ilaasortat nutaat nutaanngitsullu

Siulersuisut nutaat:

Siulittaasoq: Johannus Egholm Hansen

Finn Gaarsmand

Niels Thomsen

Christian Berg

Sulersuisutoqqat:

Siulittaasoq: Johannus Egholm Hansen

Finn Gaarsmand

Aviâja Lyberth Lennert

Jákup Sverri Kass

 Kalaallit Nunaanni Naligiissitaanissamut Siunnersuisoqatigiinni siulittaasup Kathrine Bøtkerip tupigusuutigaa, arnanik siulersuisuni ilaasortassanik nassaartoqarsinnaasimannginnera.

Arnaqannginnami piukkunnaatilinnik?

- Piginnasaqarfissanuku suut, arnat siulersuisuni ilaasortanngornissamut toqqarneqarnissaminnut amigaatigigaat?

- Kalaallit Airportsip siulersuisuini naligiissitaanissamut inatsimmik malinnikkuminaatsitsisoqarnera pillugu nalunaaruteqartoqarsimaneranik ilisimasaqanngilanga.

Siulittaasup aamma tupigusuutigaa, siulersuisuni arnartatuaasimasup siulersuisunilu maannamut ilaasimasup taarserneqarsimanera.

- Paasiuminaatsippara, Namminersorlutik Oqartussat siulersuisuni ilaasortassanik nutaanik toqqaanerminni tunngavilersuisimannginnerat, ilaasortammi nutaat toqqarneqarsimanerat inatsit malillugu pisimanngimmat.

Namminersorlutik Oqartussanit oqaaseqartoqanngitsoq

Sermitsiaq.AG-mut sapaatip akunnera naallugu Namminersorlutik Oqartussat oqaaseqartinniarneqaraluarput, iluatsinngitsumilli.

Angutit arnallu naligiissitaanissaat pillugu Inatsisartut inatsisaat nr. 3, 29. november 2013-imeersoq:

Kapitali 3 § 7. Naalakkersuisut siulersuisuinut, sinniisoqarfinnut aamma assigisaanik ataatsimoorussamik aqutsisoqatigiinnut ilaasortanik toqqaasuutillugit, toqqaaneq ima ingerlassaaq siuiaassutsit arlaat aapparminnit ilaasortamik ataasiinnarmik amerlanerussuteqassallutik.

KNR-mi ajornartorsiut taannarpiaq aamma misigineqarsimavoq, tassanali akerlianik pisoqarsimalluni. Tassa december 2018-imi siulersuisut nutaat toqqarneqartut tassaasimapput arnat sisamat angullu ataaseq.

- Suliamik aallartitsinissatsinnut qaammatit arlallit ingerlasimapput, tassa siulersuisuni naligiissitsisussaaneq pillugu inatsit malissinnaasimannginnatsigu. Tamatuma kinguneranik siulersuisuni ilaasortat taarserneqarsimapput, maannalu anguit marluuvugut, KNR-p siulersuisuini ilaasortaq Jørgen Chemnitz Sermitsiaq.AG-mut oqaluttuarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER