Skip to main content

Kalaallit Airports: Partii Naleraq Danmarkip piginneqataanissaanut akuersaanngilaq

Jens Napaattuup naalakkersuisoqataasut Danmarkip naalagaaffiata Kalaallit Airportsimut millioninik pingasunik kisitsisitalinnik aningaasaliinissaa pillugu ilisimatinneqarsimannginnera kamaatigaa. Naalakkersuisoqatigiinni akerleriinneq aatsaat taama annertutigilerpoq

Danmarkip naalagaaffiata Kalaallit Airportsimut millioninik pingasunik kisitsisitalimmik aningaasaliinissamut maanna piareersimaneranik Sermitsiaq.AG-p tallimanngornermi qulaarinera uissuummissutigineqartorujussuuvoq. Naalakkersuisullu siulittaasuat Kim Kielsen (S) uissuumminartoq tamanna pillugu eqqissisaagasuanngippat tamanna naalakkersuisoqatigiinnermut ajornartorsiutaalersinnaavoq.

Tassami naalakkersuisoqataasulluunniit Lars Løkke Rasmussenip Danmarkip aningaasaliissutissaanut piumasaqaatit inissinniassallugit ataasinngornermi Nuummut tikinnissaanik ilisimatinneqarsimanngillat. Taamaattoqarneralu Partii Naleqqap politikkikkut oqaaseqartartuata kissaammissutigaa.

- Taamatut suleriartoqarnera isumaginneriartoqarneralu quarsaarutigaavut. Tamakkuninnga tusagassiuutini atuarnitsigut aatsaat paasitinneqarnerput ilumoorsinnaanngilaq. Aamma paasissutissanik tigussaasunik tunineqarsimannginnerput pakatsissutigisorujussuuarput, Jens Napaattooq Sermitsiaq.AG-mut oqarpoq.

Kim kisermaassiniartutut pasilleraa

Pakatsinerlu ima annertutigaaq, Partii Naleqqap naalakkersuisoqatigiit atasinnaassuseqarnerat apeqquseqqittariaqalerlugu.

- Naalakkersuisut nuimanersaata kisermaassinera paasissutissanillu amigaateqartitaanerput qatsulluinnarpavut. Naalakkersuisut siulittaasuat imminut aperisariaqalerpoq, kisermaasserpalaartumik suleriarnerminut tamatumunnga tunuliaquttaminit tapersersorneqarluni taamalu amerlanerussuteqarnerluni, Jens Napaattoq (PN) kissaammersimaartoq oqarpoq.

AAMMA ATUARUK​​​​​​​:

Mittarfiliornissanut atatillugu Lars Løkke millionilikkuutaanik aningaasaliiniartoq

Jens Napaattuup suleriaaserineqartoq kisiat quarsaarutiginngilaa, aammali imarisaa, Sermitsiaq.AG-mi issuarneqartoq akueriuminaatsilluinnarlugu.

- Naalakkersuisut siulittaasuat tupaallannartorujussuarmik quarsaarnartorujussuarmillu saqqummiussaqarpoq. Oqareernittulli, Danmarkip naalagaaffianut isumaqatigiissummi sunarpiaq siunertarineqassanersoq nalulluinnnarparput, tamannalu paasisariaqarparput.Løkke tikitsinnagu akineqarusuttut

Jens Napaattooq (PN) oqaluttuarpoq, ataatsimiititaliat attuumassuteqartut ​​​​​​ ataasinngornermi suut Kim Kielsenimit (S) aamma Lars Løkke Rasmussenimit (V) oqaloqatigiissutigineqarnissaat pillugu paasissutissat eqqoqqissaartut pissarsiariniarlugit Naalakkersuisunut saaffiginnissuteqareersimasut.

- Lars Løkke Rasmussen nunatsinnut tikitsinnagu ilisimatitsissuteqarfigineqarnissarput naatsorsuutigaarput. Annertunerusumik paasisaqarnissarput innuttaasut sinneri peqatigalugit pissangalluta utaqqilerparput, Jens Nappaattooq oqarpoq.

- Suliniutip mittarfiliortiternissatut angitigisup innuttaasunut piviusorsiortumik oqaloqatiginnissutiginagu ingerlanneqarnera isornarluinnarpoq.

Piginneqataanissaq tapersersorneqanngitsoq

Sermitsiaq.AG-p paasissutissaatai naapertorlugit, naalagaaffik millionilikkuutaanik aningaasaliissuteqarnermigut ingerlatseqatigiiffimmut piginneqataalissaaq, Namminersorlutilli Oqartussat aalajangiisuusumik suli amerlanerussuteqassallutik.

- Paasissutissat tusagassiuutinit saqqummiunneqartut eqqortuusimappata, aamma eqqortuunerannik apeqqusiinissamut tunngavissaqanngilanga, ima oqaannarsinnaavunga: Naalakkersuisut siulittaasuata uatsinnit tapersersorneqarnissani naatsorsuutigissanngilaa, Jens Napaattooq oqarpoq.

AAMMA ATUARUK:

Danmarkip mittarfiliortiternissamut akuliunniarnera kamaatigineqartoq

Naalakkersuisoqatigiit naluneqanngitsutut Inatsisartuni ataasiinnarmik amerlanerussuteqarput. Taamaattumik Partii Naleqqap ilaasortai pingasut tapersersuinerminnik tunuartitsippata, taava naalakkersuisoqatigiinni Lars Løkke Rasmussenip neqeroorutaata akuerinissaanut amerlanerussuteqartoqarunnaassaaq.

- Partii Naleqqap anguniagaraa, Danmarkimit isumalluuteqarunnaariartuaarnissaaq, ilaatigut suliassaqarfinnik amerlanerusunik tigusinikkut. Taamaattumik naalagaaffik Kalaallit Airportsimut akuutikkusunngilarput. Taamami pisoqarpat naalagaaffinngorniarnissamik suliniutivut kinguarsarneqaannassapput.

Partii Naleraq naluneqanngitsutut mittarfiliortiternissamut saqqummiunneqarneratut iluseqartillugu aallaqqaaterpiaaniilli isorinnittuusimavoq. Piffissami kingullermi pisut tunngavigalugit partii isorinninnermini eqqortumik saqqummiussisimasutut misigisimavoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER