Kalaallit Airportsip sulisut marloriaammik amerliniarpaat
Kalaallit Airportsip siulersuisuini siulittaasoq, Johannus Egholm Hansen, ingerlatseqatigiiffimmi sulisut amerlassusaat marloriaataat sinnerlugit amerleriassasut, ingerlatseqatigiiffiup marlunngornermi ataatsimeersuarnerani ilisimatitsissutigaa.
Ilulissani, Nuummi aamma Qaqortumi mittarfissat nutaat sanaartorneqarnissaannut suliniutip annertuup pilersaarutaa Johannus Egholm Hansenip oqaluttuaraa.
Sanaartornerup ingerlanneqarnerani
- Suliniutini sanaartornerup ingerlanneqarnissaa qanilligutsigu sulisut amerlanerulissaagut. Kalaallit Airports ullumikkut katillugu tallimanik sulisoqarpoq.
Johannus Egholm Hansenip sulisut amerlinissaannik pisariaqartitsineq Sermitsiaq.AG-mut itisilerpaa.
Aamma atuaruk: Mittarfiit nutaat ima isikkoqassapput
- Suliniummik aqutsisunik amerlanerusunik pisariaqartitsilissaagut, siulersuisunilu aamma ingeniørit ilinniakkaminnik naammasseqqammersut sulisorinissaat kissaatigaarput, taamaalillutik suliniutinik annertuunik sanaartornermi misilittagaqalersinnaaniassammata, siulersuisuni siulittaasoq nassuiaavoq, taassuma siunissami annertuunik sapusiornerni aamma aatsitassarsiorfinnik suliniutini piginnaasat taakkorpiaat piumaneqartussaanerannut unnersuussivoq, taakku ingeniørit Ilulissani, Nuummi aamma Qaqortumi mittarfissuit sanaartorneqarneranni misilittagaqarfigilersinnaavaat.
Qinersinerup Nuummi suliniut kinguaattoortikkaa
Oqartussanit akuersissutit pisariaqartinneqartut pissarsiarineqarsimannginnerat pissutigalugu, qinersinerup Nuummi suliniut qaammatinik arlalinnik kinguaattoortikkaa, Johannus Egholm Hansen ilisimatitsissutigaa. Taamaakkaluartoq mittarfinnut pingasunut suliniut tamarmiusoq oktoberimi 2022-imi piariissasoq siulersuisut naatsorsuutigaat.
Ataatsimeersuarnermi naatsorsuutit akuerineqarput, qaammatit 18-it ingerlanerini 54 millionit koruunit tassani atorneqarput.