Kalaallit Airportsip sulisuni amerliniarai
Mittarfinnik ingerlatseqatigiiffik Kalaallit Airports atorfinnik nutaanik pingasunik pilersitseqqammerpoq, taamalu amerlanerusunik sulisoqalerniarluni
Mittarfinnik ingerlatseqtigiiffik ullumikkut pisortaaneq Peter Wistoft siuttoralugu qulinik sulisoqartoq, pilersaarusiornermi aqutsisussanik marlunnik attaveqaateqarnemilu pisortassamik ataatsimik sulisussarsiorpoq.
Siuisinnerusukkut ilisimatitsissutigineqarpoq, pilersaarusiornermi pisortaanerup Johannes Ehmannip qaammatialunnguit sulereerluni aggustusip 18-iani suliunnaartup taartissaanik sulisussarsiortoqartoq. Mittarfinnik ingerlatseqatigiiffik sulisussamik piukkunnartumik suli pissarsinngilaq, Peter Wistoftilli Sermitsiaq.AG-mut ilisimatitsissutaa atorfik inuttalerneqassasoq.
Pilersaarusiornermi aqutsisut
Pilersaarusiornermi aqutsisut marluusut aappaata mittarfissat nutaat ukkatarissavai, aappaatali mittarfiup illutassaasa naammassillugit suliarineqarnissaat qulakkiissallugu.
Attaveqaateqarnermi pisortassap suliassai ilaatigut imatut nassuiarneqarput:”Suliassat assigiinngitsorpassuuppuut, paasititsiniaanermiit innuttaasunillu ataatsimiitsitsisarnermiit attaveqartarnermik ingerlatsisarnerup ineriartortinneqarnissaanut piffissamullu ungasinnerusumut periusissiortarnissamut”.