Kalaallit Airportsip sulinini unikaallatsippaa
Mittarfiliornissanut neqeroortitsinissat Kalaallit Airportsimit kinguartinneqarallarput. Politikkikkut nalornisoqarnera pissutigalugu Kalaallit Airport taama aalajangiipput
Kalaallit Airports-imi siulersuisut ippassaq siulersuisui sisamanngormat ataatsimiipput. Angallannermut naalakkersuisoq Simon Simonsen pingasunngormat Kalaallit Airport qinnuigaa suliatik ingerlatiinnaqqullugit.
- Nuummi aamma Ilulissani mittarfissanut sanaartornermi suliassat neqeroortitsivigineqarnissaannut, sanaartornermut inatsimmut tunngatillugu politikkikkut paasinarsisitsinissaq utaqqineqartariaqarpoq, mittarfinnut ingerlatseqatigiiffimmi siulersuisut oqarput.
Kalaallit Airports-imi siulersuisut ippassaq siulersuisuni ataatsimiinnerminni aalajangerput, Ilulissani aamma Nuummi mittarfissanut sanaartornermi suliassat neqeroortitsivigineqarnissaat pilersaarutigineqartoq, kinguartikkallarniarlugu.
Paaseqatigiiffiusoq
- Neqeroortitsinissap kinguartikkallarneqarnissaa pillugu aalajangerneq Naalakkersuisut paaseqatigilluarlugit pivoq, aammalu illuatungeriit neqeroortitsinissamut tunngavissat pisariaqartumik paasinarsisinneqarnissaannut periarfissaqartitsinissaq siunertarineqarluni, Kalaallit Airportsimi siulersuisuni siulittaasoq Johannus Egholm Hansen tusagassiutinut nalunaarummi oqarpoq.
- Kalaallit Airports-ip sanaartornermut inatsisissatut siunnersuutip Aningaasaqarnermut Akileraartarnermullu Ataatsimiititaliami suliarineqarnerata ingerlaqqinnissaa qilanaaraa, aammalu Inatsisartunut, Ataatsimiititaliamut aamma Naalakkersuisunut, taakkua inatsisissatut siunnersuummik suliarinninnerisa nalaanni, suli tamakkiisumik piareersimassalluni, nangilluni oqarpoq.
Suliassat allat
Kalaallit Airports-imi pisortaaneq Steffen Ulrich-Lynge paasissutissiivoq, Ilulissani aamma Nuummi mittarfinnik sanaartornissaq pillugu neqeroortitsinissamut, maajip qaammataani entreprenørinut piukkunnartussarsiuussinermi piukkunneqartunut nassiussisoqartussanngoraluartoq, taamaalilluni taakkua aasap ingerlanerani suliarinnissinnaassagaluarlutik.
Kalaallit Airports-ip neqeroortitsinissamut paasisaqarnissap utaqqinerani, suliffeqarfiup ingerlatat allat suli ingerlasut naammassiniarlugit ingerlateqqissavai, taamatullu ingerlatseqatigiiffiup aqutsisui apeqqutit Inatsisartut, Aningaasaqarnermut Akileraartarnermullu Ataatsimiititaliap aamma Naalakkersuisut apeqqutissarisinnaasaannut akissuteqarnissamut piareersimapput.