Kalaallit Airportsip suliarinnittussarsiornermi ingerlatseqatigiit puigorai
Nuummi Ilulissanilu mittarfiit nutaat sanaartorneqarnissaannut neqerooruteqarnissamut kikkut piukkunnaateqarnersut ilisimaqqissaannginnguatsiarpaat.
Sanaartugassanik suliarinnittartunit ingerlatseqatigiinnit arfineq-marluusunit sisamat tunuarlutik imaluunniit neqerooruteqarniarnatik aalajangersimasut paasinarsivoq, Sermitsiaq.AG-p tamanna tusarpaa.
Akerliusoq
Kalaallit Airportsip qanittukkut tusagassiuutinut nalunaarutaanut tamanna akerliuvoq, ingerlatseqatigiiffiup tassani ilisimatitsissutigaa, sanaartugassanik suliarinnittartunit arfinilinnit piukkunneqartunit pingasunik neqeroorfigineqarsimalluni.
Kalaallit Airports A/S juunip 17-anni tusagassiuutinut nalunaarummi ima allappoq:
Issuaaneq aallartippoq:
Kalaallit Airports A/S nalilersueqqissaariarluni nunarsuaq tamakkerlugu suliffeqarfiit uku arfinillit mittarfiliornissamut neqeroorusiortippaat.
- Aarsleff – Ístak Joint Venture (Danmark/Island)
- BAM International bv. (Holland)
- China Communications Construction Company Ltd. (Kina)
- Munck Gruppen A/S (Danmark)
- MT Højgaard A/S (Danmark)
- Pennecon Dexter Joint Venture (Canada)
Aarslef-Istak piffissaq sivikitsoq ingerlareersoq neqeroorusiornissamut tunuarpoq, kingorna MT Højgaard aamma China Communications Construction Company Ltd. tunuarput.
Issuaaneq naavoq
2018-imi oktobarimi mittarfinnik ingerlatseqatigiiffiup canadamiut ingerlatseqatigiit Bird Johnson Joint Venture piukkunnaatilittut toqqarpaa, Aarsleffimut taarsiullugu. Sermitsiaq.AG-p aamma canadamiut ingerlatseqatigiiffiup pisortai marluk decembarimi 2018-imi Kalaallit Nunaanni suliassamut sanaartugassanik suliarinnittussarsiormata allaaserinikuuai.
Neqeroorusiortitsinermi iluatsitsinnginnerup pingaannginnerusutut saqqummiunniarlugu, canadamiut ingerlatseqatigiiffiat taanngilisiuk?
- Naagga. Kukkuneq tassani pineqarpoq. Neqeroorutit taama ikitsiginerat naammagisimaarnagu isertuunnikuunngilarput. Kisianni taakku neqeroorutit pingasut pissarsiarisagut nuannaarutigigut qularutigineqassanngilaq. Suliami tassani allamik eqqaasassaqanngilaq, pisortaaneq Peter Wistoft, Kalaallit Airports, Sermitsiaq.AG-mut taama oqarpoq.