Kalaallit Airports nutaanik pisortartaartoq

Den nye administrerende direktør i Kalaallit Airportsimi pisortaanertaap Jens Lauridsenip, timmisartuutileqatigiiffimmi Jet Time A/S-imi Vice Presidentitut, Technicalitut,
atofimmeersuusup, Peter Wistoft taarsissavaa. Jet Time A/S juulip 21-ani akiliisinnaajunnaartutut nalunaarutigineqarpoq, Jettime A/S-itulli taaguuteqarluni aallarteqqinneqarnissaa pilersaarutaavoq. Jens Lauridsenip Jettime A/S-imi timmisartuutit aserfallatsaalineqarnissaat akisussaaffigisimavaa.

Jet Time A/S-imi atorfininnginnermini Jens Lauridsen ukiuni sisamani Mittarfeqarfinni
pisortaanertut atorfeqarsimavoq (2012 – 2016) aammalu Air Greenlandimi ukiuni marlunni teknikkinut pisortatut atorfeqarsimalluni (2016 – 2018), aamma ukiuni 9-ini Danfossimi aammalu Samson Agro-i ukiuni 5-ini siusinnerusukkut atorfeqarsimalluni.

Maskiningeniøritut ilinniagalik

Jens Lauridsen Aarhus Universitetimi maskiningeniøritut ilinniarsimavoq, CBS-imilu Global Executive MBA-qarluni, Jet Time A/S-ip nittartagaani atuarneqarsinnaavoq.

47-nik ukiulik Jens Lauridsen maanna atorfimminit suliunnaariaruni atorfittaamini sulilissaaq.

- Jens Lauridsenip Kalaallit Nunaannut aammalu Kalaallit Nunaanni mittarfinnut aamma mittarfinni suliffissuaqarnermut annertuumik ilisimasaqartup, Kalaallit Airportsip suliffissuani pisortaanertut atorfimmi neqeroorfigineqarnini akuerimmagu, aammalu siusinnerusukkut pisortaanerusup atorfimminiit soraarnissani kissaatigalugu nalunaaruteqareernerata kingorna piffissap sivikitsuaqqap ingerlanerani pisortaaninngortussamik atorfinitsitsinissap iluatsilluarnera, siulersuisut naammagisimaartorujussuuaat. Nuummi, Ilulissani aamma Qaqortumi mittarfiliassat annertoorujussuit piviusunngortinneqarnissaat pillugu Jens Lauridsen-ip suleqatigilernissaa siulersuisut qilanaarisorujussuuaat, peqatigisaanillu Peter Wistoft ukiuni kingullerni pingasuni ingerlatseqatigiiffimmi annertuumik suliaqarneranut qutsavigalugu, siulersuisut siulittaasuat Johannus Egholm Hansen oqarpoq.

Pisortaqatigiit nukittorsarneqassasut

Steen Montgomery-Andersen aningaasaqarnermut aningaasalersuinermullu pisortatut atorfinitsillugu pisortaaqatigiit nukittorsarniarlugit Kalaallit Airportsip suliffissuani siulersuisut peqatigisaanik aalajangerput.

Steen Montgomery-Andersen ingerlatseqatigiiffimmi atorfeqareersoq, 63-inik ukioqarpoq aammalu Kalaallit Nunaanni sivisoorujussuarmik inuussutissarsiornermi sulisimalluni, ilaatigut Tele Greenland A/S-imi 2005-imiit 2019-mut pisortap tulliatut aningaasaqarnermullu pisortatut, KNI A/S-imi 1997 – 2001-imi aningaasaqarnermut pisortatut, aammalu KNI A/S-imi 2019-imiilli aamma Sikuki Nuuk Harbour A/S-imi 2020-imi maajimiit siulersuisuni ilaasortaalluni.

Steen Montgomery-Andersen ulloq 1. august 2020 atorfimmi sulilerpoq.

Misilittagartooq

- ”Steen Montgomery-Andersen-ip pisortaaqatigiinniilernerani aningaasaqarnikkut aqutsinerup, aningaasalersuinerup, periusissatigut aqutsinerup, attaveqaqatigiinnerup aamma aaqqissuussaanermi inerisaanerup iluanni annertoorujussuarmik misilittagalimmik, aammalu ukiuni 25-ini Kalaallit Nunaanni inuussutissarsiornermi misilittagalimmik, ingerlatseqatigiiffik pisortartaarpoq, Jóhannus Egholm Hansen oqarpoq.

Kalaallit Airports Holding A/S-imi, Kalaallit Airports Domestic A/S-imi aamma Kalaallit Airports International A/S-imi pisortaaqatigiit matuma kingorna tassaalerput:

Jens Lauridsen, pisortaaneq

Aviaaja Karlshøj Knudsen, suliniutinut pisortaq

Steen Montgomery-Andersen, aningaasaqarnermut aningaasalersuinermullu pisortaq