Kalaallit Airports Internationalimi Danmarki siulersuisuni marlunnik inissanik pissarsivoq
Kalaallit Airportsip ataani suliffeqarfimmi siulersuisunut ilaasortaatitat piginneqataassutit naapertorlugit inuttalerneqarnissaannik, piginneqataassutsimut isumaqatigiissutip kinguneraa.
Danskit naalagaaffiat Kalaallit Airports Internationalimi siulersuisunut ilaasortanik marlunnik toqqaassaaq, Naalakkersuisullu sisamanik toqqaassallutik.
Naalakkersuisut, naalagaaffiup aamma Kalaallit Airportsip piginneqataassutsimut isumaqatigiissutaanni ullumi atsiorneqartumi tamanna atuarneqarsinnaavoq.
- Piginneqataassutit allallu pillugit isumaqatigiissut malittarisassat naapertorlugit pipput. Uagut marluk pingajorarterutaat pigaagut, naalagaaffiullu pingajorarterutaat pigalugit. Siulersuisullu taamatut aamma agguarneqassapput, Naalakkersuisut siulittaasuat, Kim Kielsen (S) Sermitsiaq.AG-mut taama oqarpoq.
Misigisaq nuannersoq
Ullumikkut isumaqatigiittoqarneratigut Kalaallit Airportsip maanna mittarfiit Nuummi Ilulissanilu sanaartorneqarnissaannut suliarinnittussarsiulerneranik kinguneqarpoq. Sanaartugassanik suliarinnittartut neqeroorutitik maajip qeqqani tunniutissavaat.
- Soorunami misigisaq nuanneqaaq. Inuiaqatigiinni alloriarnerujussuaq pisussanngorpoq, Nunatsinni aningaasaliinerit annerpaartaat massakkut atsiorparput. Mittarfiit, angallannerup aamma attaveqaatit ineriartortinnissaannut isumaqatigiissut alloriarnerujussuuvoq.
Suli isornartorsiorneqartoq
Isumaqatigiissut sapaatip-akunnerata siuliani isumaqatigiissutigineqarpoq. Atsiorneqarnissaa sioqqullugu Inatsisartuni aningaasaqarnermut akileraartarnermullu ataatsimiititaliap suliareqqaartussaavaa.
- Soorunami aningaasaqarnermut ataatsimiititaliami saqqummiukkakku, oqariartuutit assigiinngitsut oqimaalutassagaanni ersarissumik oqariartuutigivaat, Inatsisartut taamanikkut aalajangiinerat aamma saqqummiunneqarnera najoqqutaralugu suliat septembarimi siorna isumaqatigiissummut oqimaaqatigiipput.
Siorna isumaqatigiissummut atatillugu danskit piginneqataanerat taamaalillutillu sunniuteqarsinnaanerat isornartorsiorneqarnikuuvoq.
- Uani oqaatigerusuppara, piginnittuunermut tunngatillugu soorunami saqitsaannerit assigiinngitsut pisimapput. Kisianni taama atsigisumik aningaasaliigaanni, soorunami aamma piumasaqaatitaqartarpoq, Kim Kielsen (S) oqarpoq.