Kalaallit Airports akissuteqartoq

Kalaallit Airportsimi siulersuisut siulittaasuat, Johannus Egholm Hansen, Qaqortumi mittarfissaq pillugu neqeroortitsinerup taamaatiinnarneranut qisuariaatinik uissuummissutiginninngilaq. Pakatsisoqarnera kipiluttunartorsiortoqarneralu paasisinnaanerarpai, oqaatsilli atorneqartut ingasaassaanerarlugit naleqqutinngitsuunerarlugillu, taanna isumaqarpoq.

Siulittaasoq ingerlatseqatigiiffiup nittartagaani oqaaseqaammi allappoq, aviisimi ilanngutassiani annertunerusumik annikinnerusumilluunniit toqqaannartumik pasitsassaarutigineqartoq Naalakkersuisut pasinapiluttumik iliuuseqarsimasut, aammalu Qaqortumi mittarfiliassap piviusunngortussaannginnera ilisimajuaannarsimagaat.

- Uanga politikeriunngilanga aammalu politikkikkut isumaliutersuuteqarnerit Naalakkersuisut iluanni ingerlanneqartut suunersut ilisimanissaannut tunngavissaqarnanga, kisianni Kalaallit Airports Domestic A/S-imut siulersuisunut siulittaasutut aalajangersimalluinnartumik oqaatigisinnaavara, ingerlatseqatigiiffimmi aqutsisunut Qaqortumi mittarfiliassap pingaarnersiuinermi salliutinnginnissaanut, imaluunniit taassuma pisuusaarluni nqeroortitsiviginissaanut Inatsisartut imaluunniit Naalakkersuisut sukkulluunniit sunniiniarsarisimanngimmata, allappoq.

Mittarfiit pingasut assigiinngissuteqanngitsut

Siulittaasoq allappoq, Kalaallit Airportsip siulersuisui aallaqqaataaniilli suliassamik pisussaaffiliiffiusumik suliakkerneqartut, tassalu Nuummi, Ilulissani aamma Qaqortumi mittarfissanut sanaartugassanut pilersaarusiornissaq, neqeroortitsinissaq, sananissaq ingerlatsinissarlu, taamaattumillu ingerlatseqatigiiffiup suliassanik piareersaalluni suliaqarnermi Qaqortumi mittarfissaq, mittarfissat marluk sinnerisut, assinganik pingaartissimagaa.

Mittarfiliassat tamarmik siunnersuisartunit atorneqartunit aammalu sanaartugassanik pilersaarusiornermut malittarisassat assigeeqqinnaat malillugit, sanartugassanut pilersaarusiorneqarput, taamatullu taakkua neqeroortitsinermut piumasaqaatit assigeeqqinnaat atorlugit neqeroortitsivigineqarlutik, paasissutissiivoq.

- Naalakkersuisut aamma/imaluunniit ingerlatseqatigiiffiup tungaaniit pasinapiluttumik iliuuseqarneraalluni pisuutitsiniaaneq taamaalilluni pissusiviusuni ilumuunngilaq aammalu ilumuunnginnerarneqartariaqarluni, erseqqissaavoq.

Pineqartoq isiginiarsiuk

Siulersuisut siulittaasuata pakatsissutigaa, borgmester Kiista P. Isaksenimit isornartorsiuinerup ilaa sulisunut sammitinneqarmat. Taanna isumaqarpoq, borgmesterip sunilluunniit uppernarsaatissaqarani oqaaseqarnermini ingerlatseqatigiiffimmi sulisut suliaqarnerannut avoqqaarinninnera tunngavissaqanngitsoq assuarnartuliornerullunilu.

- Borgmesteri aamma borgmesterip tullia, tamarmik najukkami politikkeriusut pikkorissut ilakkuminartullu, ingerlatseqaatigiiffiup suliaqarneranut isornartorsiuerusukkunik, soorunami taamaaliorsinnaapput, kisianni taamaassappat sulisut tusagassiuutitigut avoqqaarinagit, ingerlatseqatigiiffiup aqutsisuinut saaffiginnittariaqaraluarput, allappoq.

- Isornartorsiuinitik pissusiviusunik aallaaveqartillugit saqqummiunnissaat isumagisariaqaraluarpaat, aningaasaqarnikkut piviusut, ingerlatseqatigiiffimmut siulersuisut ataqqisariaqagaat, pakatsissutiginerat pissutigalugu misigissutsitik sallinngortiinnarnagit, siulersuisut siulittaasuat allappoq.

Qasusuillutik suliinnarniartut

- Neqeroortitsinerup taamaatinneqarnerata pakatsissutigineqarnera ingerlatseqatigiiffimmi sulisunilu, Kommune Kujallermi najukkami politikkerini pakatsinertuulli, annertutigimmat, qularutigineqassanngitsoq oqaatigisinnaavara.

Johannus Egholm Larsen naggasiilluni allakkamini neriorsuivoq, Qaqortumi mittarfiliassamut ineriartortitsinermut, neqeroortitsinermut, sanaartornermut ingerlatsinermullu Kalaallit Airports Domestic A/S akisussaasuussasoq, Naalakkersuisut kissaateqaannartillugit, ingerlatseqatigiiffimmi aqutsisut sulisullu mittarfiliassani maannakkorpiaq unammilligassanut aaqqiissutissarsinissap qasusuillutik sulissutiginiaraat.