Kalaallit Airport: Piareeqqavugut

Kalaallit Airports Domesticip Qaqortumi mittarfiliorlunilu mittarfiup illutassaanik sanaartornissamut neqeroorutigineqarsimasut tamaasa misissoreersimavai, maannalu Naalakkersuisunngortitsisoqarnissaa utaqqiinnalersimallugu.

Kalaallit Airports Domesticimi naalakkersuisooqatigiinnissamut isumaqatiginninniarnerup naammassineqarnissaa utaqqimaarneqarpoq, kujataani mittarfiliornissaq pillugu Naalakkersuisunik nutaanik oqaloqateqarniarluni.

Mittarfinnik ingerlatseqatigiiffimmi pisortap Jens Lauridsenip Sermitsiaq.AG-mut ilisimatitsissutigaa, Qaqortumi mittarfiliornissamut mittarfiullu illutassaanik assigiingitsunik sanaartornissamut sanasussatut piukkunneqarsimasunit neqeroorutaasunik tamanik martsip aqqaneq-aappaanili misissuereersimallutik.

Neqeroorutit misissorneqarsimasut

- Neqeroortitsinitsinni piumasaqaatinik assigiinngitsunik neqeroorutit naammassinnissimanersut misissorsimavavut. Assersuutigalugu pisariaqartinneqartumik qularnaveeqqusiisoqarnissamik piumasaqaateqarsimanerput tassani pineqarsinnaavoq, Jens Lauridsen nassuiaavoq.

-Ingerlatseqatigiiffinnik arlaannaannilluunniit oqaloqateqarsimanngilagut. Maannalu marloriarluta neqeroortitsinitsinni angusat piginnittutsinnut, Naalakkersuisunut nutaanut saqqummiunnissaat utaqqiinnalerparput, Jens Lauridsen neqeroorutigineqartunut atatillugu akigitinneaqarniartunik saqqummiusserusunngitsoq nassuiaavoq.

Neqeroorutigineqarsimasut ataasiakkaarlugit nalilersorsimavavut, mittarfinnillu ingerlatseqatigiiffiup uuttuutissatutut saqqummiussimasai assigiinngitsut tunngavigalugit sanaartortussanik toqqaasimalluta, tassa piginnittut suli sanaartortitserusuppata Kalaallit Airportsip sanasut kikkut suliakkinneqassanersut tunngaviatigut aalajangereersimavai.

Sanasoq ataaseq peqataajunnaarsimasoq

Neqeroortitsinermi angusat pissanngatigineqarput, tassa Qaqortumi mittarfiliornissamut mittarfinnut inatsit malillugu aningaasat immikkoortinneqarsimasut iluini akigitinneqarniartut naammannissaat ilimanarpallaanngimmat.

Sanasup ataatsip mittarfiliornissamut neqeroorummik kingusinnerpaamik martsip aqqaneq-aappaani tunniussinissaq naammassisinnaasimannginnamiut neqeroorumminik tunniussisinnaasimanngilaq. Kalaallit Aiportsimit ingerlatseqatigiiffik sorleq pineqarnersoq maannakkorpiaq ilisimatitsissutigineqarusunngilaq, piginnittut ilisimateqqarneqarnissaat pillugu isumaqartoqarmat.

Sanaartortussatut piukkunneqartut

Mittarfiliornermut:

MT Højgaard A/S

Aarsleff Istak

JK Petersen Contractors

Munck Havne & Anlæg

Pennecon Heavy Civil Ltd

Illutassanik sanaartornermut:

ArtiCon

Permagreen Greenland A/S

Ístak hf

MT Højgaard A/S

Powered by Labrador CMS