Kalaallit Agga-taat 70-inik ukioqalerpoq
Meeqqat amerlanerpaat 1980-ikkunni 1990-ikkunnilu meeraasimasut Atsa Rosa KNR-ikkut aallartikkaangat erinarsuut eqqaamassajunnarsivaat. Meeqqanut inersimasunullu sunniuteqarluarsimasoq, Agga Dam Pedersen ullumikkut 70-inik ukioqalerpoq.
Isiginnaartitsisartoq ilisimaneqarluartoq qanigisani peqatigalugit ullorsiussamaarpoq. Isiginnaartitsisartuusimanermini ullut nuannersut ilaannilu kiserliornarsinnaasut eqqarsaatigiumaarlugit, Sermitsiaq.AG-imut oqaluttuarpoq.
- Qujamasoqaanga. Nunaqqatikka eqqarsaatigivakka. Qutsavigisassaraakka tamaasa tapersersuisarsimanerisa pillugit. Inuuinni eqqaaneqarnissara naatsorsuutiginngikkaluarpara, Agga Dam Pedersen oqarpoq.
Uini Uffe Dam Pedersen peqatigalugu ullorsiorniarpoq. Kammalaatitik sisamat ullaakkorsioriaqqunikuuaat. Ullulli ingerlanerani eqqissisimaarnissaq KNR-imilu aallakaatitassiat malinnaaffigissamaarlugit. Uinilu ulloq illoqarfimmi nereqatigiinermi naggaserusuppaat.
Aggap uini Uffe Dam Pedersen ukiut 23-it matuma siorna katippaa, 2004-imilu Danmarkimut nooqqatigiillutik.
Atsa Rosa
Agga Dam Pedersen, Atsa Rosa-mik taagorneqarpiartarunnaarnikuugaluarluni Atsa Rosa-mik taaneqarluni ilassineqaraangami nuannaajallattarpoq.
- Danmarkimi Atsa Rosa-mik taagorneqarpiarneq ajorpunga. Atsa Rosa-millu taaneqaraangama nuannertartorujussuuvoq, isiginnaartitsisartoq oqarpoq.
Agga Dam Pedersen ilinniarfissuarmi atuarnermini radio-kkut meeqqanut aallakaatitsisaleqqaarpoq. Tassanngaaniillu Tuukkami isiginnaartitsisalerpoq, TV-ikkullu meeqqanoortitsineq aamma misilikkusulerlugu.
- Malu Nielsen, Kattie Egede uangalu guitarerluta tulleeriitigalugu erinarsorluta radio-kkut meeqqanut aallakaatitsisarnikuuvugut. Aallakaatitassiat nutartertuarnissai pingaartissimavagut. Taamani nuannertarsimaqaaq, Agga Dam Pedersen oqaluttuarpoq.
Kiserliorneq
Isiginnaartitsisartoq kikkunnit tamanit nuannarineqarluartoq ilaanni taama annertutigisumik ilisarisimaneqarnini kiserliornarisarsimavaa.
- Marluulluni soorlu ajunngernerusoq. Oqimaallunilu nuanneraluaannarpoq.
Aallakaatitassiat ukiut 30-t matuma siorna immiussaagaluartut ullumikkut suli isiginnaarneqartarput. Taamaammat arlaatigut soorlu Agga piginnaanini atorluarsimassagai.
- Inuit, meeqqaniit utoqqarnut aallakaatitassiat nuannaraat. Sulilu isiginnaarneqartarlutik. Taamaammat ajunngilluinnarpoq, Agga Dam Pedersen oqarpoq.
Ilinniarfinni assigiinngitsuni Agga Dam Pedersen isiginnaartitsinermi aamma pikkorissaasarsimavoq.
Agga Dam Pedersenip aallakaatitassiaasa ilaa uani isiginnaaruk: