Kalaallit aallarnisaasut nutaamik illutaarnissaat millionilikkuutaanik aningaasaliiffigineqartoq

Kalaallit aallarnisaasut nutaamik illutaarnissaat ukiuni tulliuttuni sisamani danskit aningaasanut inatsisaanni 7,5 milliuunit koruuninik aningaasaliiffigineqarpoq.

Direktøren for Det Grønlandske Hus Jørn Holbech

Nukigap siuttuuffigisaa aningaaliiffigineqarpoq, taamaalilluni Aarhusimi Kalaallit Illuat Danmarkimi Kalaallit Nunaanni suliffeqarfiit aallarnisaasut ilinniartullu qaninnerulersinniarlugit ukiuni kingullerni suliniuteqarluarsimaneranut ersersaataavoq.

Soqutiginnittoq

Nukigap suliniutaata ineriartortinneqarnissaa pisortaanerup Jørn Holbechip soqutigisaraa, taamaasilluni Kalaallit Nunaanni ineriartortitsinissamut isumassarsiat Danmarkimi nunanilu allani piginnaasat pioreersut katersuullugit inerisarneqarsinnaalissapput.

- Aallarnisaasut illussaat Aarhusimi Kalaallit Illuata ataaniitinneqarnissaa siunertaanngilaq. Isumaqarpunga inuussutissarsiorfimmik aningaasaateqarfimmik pilersitsissasugut, suliniummillu ingerlatsisinnaasumik piukkunnaatilimmik toqqagassaqareerpugut, Jørn Holbech Sermitsiaq.AG-mut paasissutissiivoq.

2019-imi milliuunit affai immikkoortinneqarsimapput 2020-p tungaanut aningaasat 1,3 milliuunit koruuninut qaffanneqassallutik, 2021-mi 2,8 milliuunit koruuninut 2022-milu 2,9 milliuunit koruuniussallutik.

Suliassat

- Suliniutini taama ittuni pilersitsinermut ineriartortitsinermullu aningaasartuutit ukiumi siullermi amerlanerpaasarmata aningaasaliissutit killormut sammisumik tunniunneqarsimanissaat orniginartinnerugaluarpara. Tassa 500.000 koruunit ukiumi siullermi ineriartortitsinermut ingerlatsinermullu amerlagisassaanngillat, Jørn Holbech oqarpoq.

- Taamaammat suli suliassarpassuaqarpoq, taanna oqarpoq.

Uku aningaasanut inatsimmi aningaasaliiffigineqarsimapput:

  • Siunnersuisartunik pilersitsineq aammalu suliffeqarfiit pioreersut kalaallillu aallarnisaasuisa attaveqaataannik pilersitsineq
  • Ilinniartut kalaallillu suliffeqarfiisa attaveqatigiinnerannik attatiinnarlugit piginnaanilinnik ineriartortitsineq
  • Aallarnisaasut isumassarsiaasa inerisarneqarnissaannut sinaakkusiineq
  • Aallarnisaasut naapeqatigiittarfiannik inerisaaneq

Aaja: Matut ammarneqarput

Taama annertutigisumik aningaasanut inatsimmi aningaasaliisoqarnera folketingimi ilaasortap Aaja Chemnitz Larsenip (IA) nuannaarutigaa.

- Kalaallit Nunaanni aallarnisaanermik suliaqarnermut tapersiineruvoq, unalu suliniut aqqutigalugu Danmarkimut nunanullu allanut matunik ammaassisinnaavoq, folketingimi ilaasortaq Sermitsiaq.AG-mut oqarpoq.

Nutaamik ineriartortitsinermik suliniut Grønlandske Erhvervsdagemut 2017-imi 2018-imilu suliffeqarfiit arlallit Namminersorlutillu Oqartussat tapersersortigalugit Aarhusimi ingerlanneqarsimasumut tapersiineruvoq.

Powered by Labrador CMS