Kalaallisuut oqaluttuamik attortinnartumik tunngaveqarluni sanaat
Ilusilersuisartup Liss Stenderip kalaallisuui qernertumik qaqortumillu taamaallaat qalipaatillit Danmarks Nationalmuseumimi saqqummersinneqassapput. Kalaallisuut anaanamut, uiminit danskiusumit meeraanik arsaarneqarsimasumut eqqaaniutitut suliarineqarsimapput.
Ilusilersuisartoq Liss Stender TV2-p aallakaatitassiassaa 'En skat til Danmark' peqataaffigisassani immiunneqalermat uummataa kassulaarpoq. Aallakaatitassiassami innuttaasut arlallit nammineq pigisaminnik nassarlutik takkussuupput, nammineq pigisat Danmarks Nationalmuseumimi saqqummersinneqartussaapput.
- Oqaluttuaq uannut tunngasupilussuaq kalaallisuunnut qernertumik qaqortumillu qalipaatilimmut tunngaviummat pissangarsuaarsimavunga, Liss Stender Sermitsiaq.AG-mut oqaluttuarpoq.
Ataataasup meeqqat aallarussimagai
Nationalmuseumimi ilisimasallit pisortamik Rane Willerslevimik siuttoqarlutik, pigisat 80-it Danmarkip ukiuni hunnorujuni kingullerni oqaluttuassartaanut ilaasut aallakaatitassiami ilaatinneqartussatut toqqarsimavaat. TV2-mi tusagassiortut tassunga atatillugu Kalaallit Nunaanni inunnk pigisalinnik oqaluttuassalinnillu ujaasisimapput.
- Anaananga pillugu oqaluttuaavoq. Oqaluttuaq siusinnerusukkut allanut tusarliunneqarnikuunngilaq.
- 50-ikkunni 60-ikkunnilu Kalaallit Nunaanni arnat oqaasissaqartinneqarsimanngillat. Danskit angutitaat nunatsinnut tikissimasut namminneq isummatik malillugit qanorluunniit iliorsinnaasimapput, Liss Stender nassuiaavoq.
- Anaananga danskeq peqatigalugu meerartaarmat, anaanannit qimagutsilluta aallarussimavaatigut. Anaanama arnallu allat taamatut inissisimasut oqaasissaqartinneqarsimanngillat aamma pisinnaatitaaffitik ilisimasimanngilaat.
Assit qalipaateqanngittuinnaat
Liss Stender 2015-imi qernertumik/qaqortumik qalipaatilimmik kalaallisuuliulerami tamanut saqqummiunneqarnissaa eqqarsaatigisimanngikkaluarpaa. Nukarlequtaata apersortinneranut atatillugu atorneqartussaasimammata.
- Anaanama oqaluttuassartaa puigorneqassanngimmat anaanannut ataqqinaatitut suliaapput. Apersortitsinermi anersaakkut ilagisussaagatsigu.
Kalaallisuut immikkut ittut ilusilersorniarneranni eqqarsaaterpassuit atorneqarsimapput.
- Anaananga kalaallisoortoq pillugu assimik ujaasisimagaluarpunga, ilaquttamali arlaannaataluunniit anaananga kalaallisoortoq qalipaaatilimmik assiutiginngilaat. Asseq pigisatuara qalipaateqanngilaq.
- Taamaammat imminut oqaloqatigisariarlunga anaanangalu tarnikkut oqaloqatigeriarlugu aalajangerpunga, kalaallisuut qernertumik qaqortumillu qalipaateqassasut.
Liss Stenderip oqqaluttuaq tamaat Nationalmuseumimi ilisimasalinnut oqaluttuarisimavaa, oqaluttuamullu attortissimaqigamik kalaallisuut saqqummersitassat 80-it akornanniissasoq aalajangersimallutik.
Killitsinnartoq
Aallakaatitassiassamut immiussinerit oktoberilli qaammataani pereeraluartut, ilusilersuisartup akuersaarneqarami misigisimasani utersaarfigaa.
- Saqqummersitsisunut peqataanissara killitsissutigeqaara. Sungiussimangaarakku 'itigartinneqartarnera', 'akuersaarmata' upperisinnaanngingajappara.
- Tusarnaarmata nuannaarutigeqqaara.
Neriuutigaalu Nationalmuseumimut takuniaasut kalaallisuut immikkut ittut pillugit oqaluttuaq maluginiarumaaraat.
- Neriuutigaara, kalaallit qulaatiinnarlugit iliuuseqartoqarsimaneranut kalaallit qanoq misigisarnersut inunnit paasineqassasoq. Pitsaanngitsumik iliuuseqartoqartarsimasoq takuneqarsinnaassasoq, takuniaasullu kalaallinut isiginneriaasertik allanngortissagaat.
Anaanani ilisarisimalivissimanngikkaa
Liss Stenderip anaanani ilisarisimalivissimanngilaa, anaanaami suli utoqqalinani toqusimavoq. Taamanikkut pania 18-iinnarnik ukioqarpoq.
- Eqqarsaatigilaariarsiuk meeqqaminik taamatut arsaagaalluni qanoq alianartigisimasinnaanera.
Saqqummersitsineq 'En skat til Dannmark' apriilip aallaqqaataani ammarneqassaat, oktoberillu 18-iata tungaanut ammassalluni.
Liss Stenderip kalaallisuuinik saqqummersitsinissamik aalajangerneq TV2-kkut februaarip 18-iani unnuap qeqqata qeqqa qaangilaarnerani takoqqinneqarsinnaavoq.