ilinniartitaaneq
'Kalaallisut piginnaasallit qanoq amerlatigisut Ilisimatusarfimmi ilinniagaqarlutik aallartissimappat?'
Inatsisartuni ilaasortaq Laura Táunâjik (S) paaserusuppaa, Nuummi Ilisimatusarfimmi kalaallisut piginnaasallit qanoq amerlatigisut ilinniagaqarlutik aallartitsisimanersut
- Ilisimatusarfiup ilinniartut qinnuteqartut qallunaatut oqaatsinik piginnaaneqarnerat aallaavigalugu ilinniartussanik akuersissuteqartarnersoq, imalunniit kalaallisut oqaatsinik piginnaaneqarnerat aallaavigalugu ilinniartussanik akuersissuteqartarnersoq paasissallugu soqutigivara.
Inatsisartuni ilaasortaq Laura Táunâjik (S) Naalakkersuisunut apeqquteqarluni allappoq.
- Kalaallisut oqaasillit Ilisimatusarfimmi ilinniarfinni ilinniartunngornissaminnik qinnuteqarsimagaluartut akuerisaanngitsut Danmarkimi universitetini ilinniarnissamik akuerisaasimasut naapittarpakka. Eqqarsarnarpoq kalaallit inuusuttut nunaminni oqaatsitik atorlugit ilinniarusuttut Ilisimatusarfimmiit taamannak akimmisaartinneqartarmata, taanna apeqquteqaammini tunngavilersuivoq.
Laura Táunâjip apeqquserpaa qallunaatuinnaq oqaasillit kalaallisut misilitsittariaqannginnerat pissutigalugu periarfissagissaarnerusarnerat.
- Akerlianilli kalaallisut oqaasillit hovedfagip ataatsip peernissaanik periarfissinnagit. Meeqqat atuarfianniit ingerlaqqinngitsoortartut ilisimavagut, kisiannili aarloqqutigaara GU-mit ilinniarnertuut kalaallisut oqaasillit Ilisimatusarfimmi ilinniarnissamik soqutiginnikkaluit ingerlaqqinngitsoortartut amerliartornissaat, Laura Táunâjik oqarpoq.